Deputadu PLP preokupa loron eleisaun Parlamentár monu iha domingu
DILI, 14 fevereiru 2023 (TATOLI)—Deputadu hosi bankada Partidu Libertasaun Populár (PLP), Noe da Silva Ximenes ‘Buka Tuir’, preokupa Xefe Estadu marka loron eleisaun Parlamentár iha loron 21 maiu 2023, ne’ebé monu loos iha loron domingu.
Notísia Relevante: Prezidente Repúblika dekreta loron eleisaun Parlamentár iha 21 maiu
“Ha’u lori PLP nia naran hakarak apresia Prezidente Repúblika (PR) hodi dekreta ona loron eleisaun parlamentár. Maibé, iha kestaun ne’ebé ha’u hakarak koloka mak data eleisaun (21 maiu 2023) monu domingu, loron ne’ebé timoroan barak normalmente ba misa,” Deputadu PLP ne’e hateten iha reuniaun plenária PN, tersa ne’e.
Nia dehan, kestaun refere antes ne’e Prezidente-Repúblika (PR) dekreta loron eleisaun parlamentár ne’e, PR konsulta rona mós igreja katólika ka lae tanba Timor-Leste maiória ema katólika.
“Ha’u kestiona tanba Prezidente Repúblika ne’ebé hanesan Laureadu Prémiu Nobel ba Páz, maibé la haree ba kestaun kiik sira hanesan ne’e no ida-ne’e bele implika ba taxa partisipasaun povu nian bele menus,” nia dehan,
Maibé, nia hateten, ho desizaun PR Horta nian dekreta ona loron eleisaun parlamentár ne’e, ema hotu tenke simu desizaun ne’e.
Deputada KHUNTO, Olinda Guterres, hateten PR dekreta eleisaun halo konfuzaun de’it tanba iha momentu ne’ebé PR haruka Primeiru-Ministru atu altera lei Eleitorál ba Parlamentu Nasionál, maibé agora ita PN seidauk aprova lei ne’e, PR dekreta uluk ona loron eleisaun.
Maske PR iha kompeténsia prerogativu tomak atu dekreta loron eleisaun, nia hateten, Prezidente Repúblika, José Ramos Horta mós presiza hanoin mós.
“Ba ami partidu KHUNTO, sa oras no data iha loron domingu ka segunda, ami naran de’it. Maibé tuir regra Prezidente ko’alia tiha hotu muda fali hanoin seluk, ne’e mak halo konfuzaun. Ha’u ko’alia hanesan ne’e la’ós Prezidente labele dekreta, ne’e lae,” nia dehan.
Deputadu Partidu Demokrátiku (PD), António da Conceição ‘Kalohan’, hateten kompeténsia plena Prezidente Repúblika nian atu foti desizaun, tanba ne’e laiha problema relasiona ho loron domingu no sarani sira ba tiha misa hafoin ba tuir vota, tanba ne’e tenke respeita malu ho desizaun ne’ebé iha.
Nia dehan, bele mós Prezidente Repúblika tetu desizaun inklui fasilita mós timoroan sira iha rai-li’ur tuir vota, tanba hanesan traballadór iha loron domingu la hala’o serbisu bele partisipa hodi ezerse sira-nia direitu votu iha eleisaun parlamentár ne’e.
Prezidente Parlamentu Nasionál, Aniceto Longuinhos Guterres Lopes, hateten PR dekreta ona loron eleisaun parlamentár no PN kontinua hala’o nia kna’ar halo diskusaun alterasaun lei Eleitorál ba PN sei kontinua.
Nia hateten, iha tersa (14 fevereiru 2023) ne’e, iha tuku 16h00 lorokraik ne’e, plenária PN sei realiza votasaun finál globál ba proposta lei númeru 50/V(5a)-alterasaun dalima lei númeru 6/2006, 28 dezembru, ne’ebé aprova Lei Eleitorál ba PN.
Notísia Relevante: Bele uza lei anteriór bainhira diskusaun lei eleitorál ba PN demora
Jornalista : Nelson de Sousa
Editór : Cancio Ximenes
