Governu nafatin investe ba projetu TL-Cement
DILI, 14 fevereiru 2023é (TATOLI) – Ministru Koordenadór Asuntu Ekonómiku, Joaquim Amaral, hatete Governu kontinua halo investimentu ba projetu TL-Cement, maski antes ne’e iha reuniaun Konsellu Ministru deside hodi enserra konta bankária aberta ba projetu ne’e.
Governu taka konta bánkaria aberta iha tinan 2018 hamutuk ho Banku Sentrál Timor-Leste (BCTL, sigla portugés), titulada husi Autoridade Nasionál Petróleu no Minerál, relasiona ho projetu TL Cement, no transferénsia husi montante ne’ebé depozita iha konta ne’e ba iha konta tezouru nian tuir rekomendasaun hosi Kámara Konta atu devolve hikas mai iha tezouru Estadu nian.
Osan hamutuk millaun $50 ho ninia juru sira, osan ne’e dezde kriasaun iha tinan 2018 to’o mai agora iha hela konta iha rai-li’ur.
“Governu kumpre rekomendasaun Kámara Konta nian no hosi ida ne’e sei iha avaliasaun molok kontinua projetu. Ne’ebé, montante boot liután Governu tau hodi kontinua”, Ministru Koordenadór ne’e hateten ba Agência Tatoli, iha City 8, Manleuana, tersa ne’e.
Nia hatutan tanba investimentu estratéjiku hanesan ne’e tenke trata ho kuidadu, tanba Ezekutivu halo parseria ho empreza sira hosi rai-li’ur.
“Ema ida ka rua halo sala idaidak ba hatán, hanesan kompañia nia atividade investimentu ne’e tenke hatudu katak ita loke-aan atu simu investimentu hosi li’ur no serbisu hamutuk bainhira hasoru problema iha investimentu”, nia dehan.
Akordu espesiál investimentu entre parte rua hala’o ona, iha 17 maiu 2016, liuhosi Rezolusaun Governu n.u 41/2016, loron 23 novembru, ne’ebé aprova partisipasaun Estadu Timor-Leste iha sosiedade komersiál ne’e.
Iha loron hanesan parte sira halo kontratu ida hodi aumenta kapitál no transforma sosiedade tuir kuota sai sosiedade anónima, hafoin kria konta bankáriu ne’ebé titulár hosi ANPM hodi garante fundu ba investimentu.
Notísia relevante : https://tatoli.tl/2023/02/01/governu-enserra-konta-bankaria-ligadu-ho-projetu-tl-cement/
Jornalista: Antónia Gusmão
Editora: Maria Auxiliadora
