MS husu populasaun hotu nafatin fó konfiansa ba HNGV
DILI, 14 fevereiru 2023 (TATOLI) – Ministra Saúde Odete Maria Freitas Belo, husu ba populasaun hotu iha Timor-Leste atu nafatin fó konfiansa ba Hospitál Nasionál Guido Valadares (HNGV) hodi fó atendimentu ne’ebé profisionál ba pasiente sira.
“Ita-nia Hospitál Nasionál Guido Valadares (HNGV) ida ne’e ita tenke fó konfiansa, labele moras kois hanesan me’ar, inus-metin ruma, halai ba klínika privadu hodi hateten at ita-nia ospitál nia atendimentu la di’ak”, Minsitra Saúde Odete Maria Freitas Belo, informa asuntu ne’e iha Novo Turismu, ohin.
Nia defende asuntu ne’e tanba informasaun ne’ebé mak lansa iha públiku katak klínika privadu nia atendimentu di’ak dúke atendimentu husi HNGV.
“Ema ki’ak sira durante ne’e nunka ba klínika privadu atu halo tratamentu tanba sira osan la iha, maibé sira hakarak mak ba halo tratamentu HNGV ne’ebé mak ita harii durante tinan 10 resin, entaun ida ne’e mak ita-nia médiku sira fó tratamentu ona ba pasiente sira ne’ebé mak presiza ita-nia tulun”, nia revela.
Nia konta, ema riku sira buka mak klínika privada tanba sira osan iha no sira tratamentu tuir sira hakarak hanesan iha li’ur; Indonézia, Malazia no Singapura hodi buka kualidade, la presiza ba HNGV, entaun sira kestiona katak atendimentu la di’ak maibé ida ne’e mak fatin moras nian.
“Ha’u atu dehan fatin HNGV ne’e ema hotu nian, labele hein hodi kestiona kona-ba kualidade no atendimentu hafoin halo komparasaun ba klínika privadu sira”, nia esklarese.
Ezekutiva ne’e esplika, HNGV fatin ne’ebé mak halo tratamentu tersiáriu nian tanba ne’e fila fali ba ema hotu nia-an atu fó konfiansa ba HNGV hodi simu atendimentu ne’ebé di’ak husi profisionál saúde sira.
Jornalista : Felicidade Ximenes
Editór : Zezito Silva
