STAE-MOP sei hadi’a Estrada rurál hodi distribui materiál eleisaun parlamentár
DILI, 14 fevereiru 2023 (TATOLI)–Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten STAE halo koordenasaun Ministériu Obra Públika (MOP) hodi hadi’a Estrada ne’ebé aat iha área rurál sira, nune’e bele distribui materiál eleisaun parlamentár 2023 ne’e.
Notísia Relevante: STAE preparadu realiza eleisaun parlamentár
“Ita servisu hamutuk ho diretór jerál Obra Públika atu hadi’a estrada iha área rurál sira-ne’ebé relasiona ho eleisaun lejizlativa ne’e bele lori material eleisaun to’o iha baze,” nia hateten ba jornalista sira iha Caicoli, tersa ne’e.
Nia dehan, MOP atu fó ona instrusaun ba Prezidente Autoridade Munisipál no Administradór Postu Administrativu sira hodi identifika lista estrada sira iha área rurál sira atu bele diretamente hadi’a Estrada ne’ebé aat.
Ministériu Obra Públika (MOP) sei kolabora ho Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P) atu hadi’a estrada rurál sira iha territóriu Nasionál hodi fasilita distribuisaun materiál eleitorál.
“Estabelese ona IGEADE, IP neen iha rai-laran atu hadi’a kondisaun estrada nian ba eleisaun sira,” Ministru Obra Públika, Abel Pires, hateten ba jornalista sira iha Palásiu Governu.
Nia hateten, nia parte sei fornese lista estrada ba IGEADE, I.P maibé se IGEADE, I.P la halo halo, MOP bele kontakta kompañia konstrusaun Nasionál sira atu halo reabilitasaun ba estrada sira.
“Ministru ne’e fó hanoin mós katak ninia Ministériu asina ona, iha tinan kotuk, Memorandu entendimentu ida ho Sekretariadu Administrasaun Eleitorál (STAE) kona-ba preparasaun ba eleisaun sira tuir mai. Ami asina ona Memorandu entendimentu ida ho STAE atu fó kompensasaun ka hadi’a estrada sira-ne’ebé presiza hadi’a iha preparasaun ba eleisaun sira,” nia dehan.
Notísia Relevante: Prezidente Repúblika dekreta loron eleisaun Parlamentár iha 21 maiu
Jornalista : Osória Marques
Editór : Cancio Ximenes
