DNTT sei halo manutensaun ba semáforu sira avaria iha kapitál Dili
DILI, 15 fevereiru 2023 (TATOLI)—Ministériu Transporte no Komunikasaun (MTK), liuhosi Diresaun Nasional Transporte no Terrestre (DNTT), iha ona planu tinan ne’e, sei halo manutensaun ba semáforu sira ne’ebé avaria iha kapitál Dili.
“Ita iha ona planu tinan ne’e, sei halo manutensaun ba semáforu sira ne’ebé avaria iha kapitál Dili, hanesan iha Palásiu Prezidente nia sorin, Jardim Colmera 05 maiu, Hospital Nasional Guido Valadares (HNGV) no sira seluk,” Diretór Diresaun Nasional Transporte no Terrestre, António da Costa hateten ba Agência Tatoli iha Balide, kuarta ne’e.
Notisia relevante : Tinan 2023: DNTT sei instala semáforu foun tolu iha kapitál Dili
Kona-ba konkursu públiku ba kompañia manán na’in atu halo manutensaun, nia dehan, sira-nia parte seidauk bele fó sai sá fulan mak loke konkursu públiku tanba buat hotu sei iha planu nia-laran.
“Maibé ninia orsamentu, tinan ne’e tau ona iha OJE (Orsamentu Jerál Estadu) 2023 ne’ebe aloka ba MTK mai iha DNTT hamutuk milliaun $2,8. Osan ne’e sei halo manutensaun nian,” nia dehan.
Jornalista : Arminda Fonseca
Editora : Armandina Moniz
