Governu aprova sistema unidade ba medida legál sira

DILI, 15 fevereiru 2023 (TATOLI) – Governu aprova ona projetu dekretu-lei, ne’ebé aprezenta husi Vise-Ministru Komérsiu no Indústria, Domingos Lopes Antunes, kona-ba sistema unidade ba medida legál sira.

“Projetu dekretu-lei ida-ne’e ninia objetivu atu garante katak unidade medida iha Timor-Leste utiliza modu hanesan no koerente iha país tomak, ne’ebé permite mediasaun ba sidadaun no entidade hotu-hotu bele kompriende, iha área oin-oin, hanesan komérsiu, indústria ka ensinu”, Ministru Prezidénsia Konsellu Ministru, Fidélis Magalhães, hateten iha Palásiu Governu.

Inisiativa ida-ne’e ho ninia objetivu atu proteje mós konsumidór no kompañia sira, hodi obriga atu uza unidade medida nian sira ne’ebé públiku hatene, no ne’ebé garante konfiansa no rigór medisaun nian sira, hodi harii ambiente ida-ne’ebé favoravel ba dezenvolvimentu ekonómiku.

“Iha nivel internasionál, utilizasaun husi unidade medida legál internasionál nian sira nu’udár fatór konfiansa fundamentál ba esportasaun no atu selebra akordu bilaterál ka multilaterál sira, iha área komérsiu, enerjia, ensinu ka indústria”, nia konklui.

Antes ne’e governante ezemplifika katak kuandu litru ida ne’e la’ós bee garrafa ida, tenke litru ida duni no mekanismu sukat litru ida ne’e mós tenke ho loloos. Nune’e mós iha merkadu sira, sé fa’an foos karik kilo ida tenke ida duni. “Ho medida sira ne’ebé sei introdús ne’e, liuliu ba konsumidór sira atu nune’e iha atividade ekonómika sira labele prejudika fali populasaun”, nia esplika.

Notísia relevante: Governu planeia kriasaun sistema unidade medida legál sira

Jornalista: Antónia Gusmão

Editora: Maria Auxiliadora