DILI, 18 janeiru 2023 (TATOLI) – Governu planeia atu kria sistema unidade medida legál sira, tanba ne’e Konsellu Ministru analiza ona opsaun polítiku-lejizlativa ne’ebé sai hanesan baze ba kriasaun sistema refere ne’ebé aprezenta husi Ministru Turizmu, Komérsiu no Indústria (MTKI), José do Carmo da Silva.
“Opsaun polítiku-lejizlativa sira ne’ebé aprezenta ho objetivu atu garante katak unidade medida iha Timor-Leste utiliza modu hanesan no koerente iha nasaun hothotu, ne’ebé permite mediasaun sira ba sidadaun no entidade hothotu bele kompriende iha área oin-oin, hanesan komérsiu, indústria ka ensinu”, Ministru Prezidénsia Konsellu Ministru, Fidelis Magalhães, hateten iha Palásiu Governu.
Nia hatutan, objetivu atu asegura konfiansa no rigór mediasaun sira, fatór ne’ebé sei permite hodi proteje konsumidór no empreza sira, kria ambiente ida ne’ebé favoravel ba dezenvolvimentu no investimentu ekonómiku no lori konfiansa ba nivel internasionál hodi aumenta esportasaun no hodi halo akordu internasionál iha domíniu komérsiu, enerjia, ensinu ka indústria.
“Ezemplu, kuandu dehan litru ida ne’e la’ós bee garrafa ida, tenki litru ida duni no mekanismu sukat litru ida ne’e mós tenki ho loloos. Nune’e mós iha merkadu sira, sé fa’an foos karik kilo ida tenki ida duni. Ho medida sira ne’ebé sei introdús ne’e, liliu ba konsumidór sira atu nune’e iha atividade ekonómika sira labele prejudika fali populasaun”, nia esplika.
Diskusaun ba opsaun polítika-lejizlativa ne’e foin iha faze aprezentasaun no iha tempu sira mai sei avansa ho dokumentu balun tan hodi hetan aprovasaun.
Jornalista: Antónia Gusmão
Editora: Maria Auxiliadora
