DILI, 15 fevereiru 2023 (TATOLI)—Partidu Libertasaun Populár (PLP), sei realiza konferénsia nasionál iha semana oin iha 25 ka 26 fevereiru tinan 2023.
Notísia Relevante: Prezidente Repúblika dekreta loron eleisaun Parlamentár iha 21 maiu
“Preparasaun la’o hela ba konferénsia nasionál ka kongresu nasionál PLP nian ne’ebé sei hala’o iha loron 25 ka 26 fevereiru tinan ne’e iha Delta Nova,” Vise Prezidente Konsellu Polítka Nasionál (KPN), Partidu Libertasaun Populár (PLP), Francisco de Vasconcelos, informa ba jornalista sira iha Parlamentu Nasionál, kuarta ne’e.
Konferénsia nasionál ne’e sei diskute ajenda sira hanesan oinsá preparasaun partidu nian hasoru eleisaun parlamentár ne’ebé Prezidente Repúblika (PR) dekreta ona loron, preprasaun ba fiskál, karik iha mós rezolusaun sira kona-ba koligasaun ho asuntu sira seluk tan.
Antes ne’e, preparasaun partidu nian konsentra liubá konsolidasaun, reajustamentu estrutura iha nivél suku no aldeia, to’o mai konferénsia munisipál no agora preparasaun ba konferénsia nasionál.
“Konferénsia nasionál ka kongresu ne’e hatudu iha lei partidu polítiku katak partidu sira-ne’ebé konkore iha eleisaun tenke halo kongresu ka konferénsia,” nia hateten.
Nia hateten, hafoin ne’e partidu sei aprezenta ninia kandidatura ba Supremu Tribunál Justisa (STJ) hodi kompetente iha eleisaun Parlamentár.
Enkuantu, konferénsia ne’e sei partisipa hosi delegadu kuaze na’in-1500 mai hosi nivél suku, postu administrativu to’o mai iha nasionál, inklui sei konvida mós lidér partidu polítiku sira seluk hodi partisipa mós.
Notísia Relevante: PLP hahú prepara estratéjia hasoru Eleisaun Parlamentár
Jornalista : Nelson de Sousa
Editór : Cancio Ximenes
