Proposta rua hosi MOP aprova ona iha Konsellu Ministru
DILI, 15 fevereiru 2023 (TATOLI) – Ministru Obra Públika (MOP), Abel Pires, aprezenta proposta rua iha reuniaun Konsellu Ministru no proposta sira ne’e hetan ona aprovasaun.
Proposta ida mak kona-ba prosedimentu aprovizionamentu ba adjudikasaun kontratu públiku nian ida ba ezekusaun obra no finansiamentu sasán ba kriasaun kompleksu komunikasaun sira ba instalasaun estasaun aterrajen nian ba kabu submarinu fibra ótika nian, ne’ebé sei liga sidade Dili ba sidade Darwin no Port Hedland, katak remata ona sein kualkér vensedór.´
Ministru Prezidénsia Konsellu Ministru, Fidélis Magalhães, hateten ho aprovasaun ne’e Konsellu Ministru taka ona prosesu aprovizionamentu ne’ebé halo antes ne’e ba konstrusaun aterrajen nian, no fó fali biban ba komisaun interministeriál halo fali desizaun ida tuir prosedimentu aprovizionamentu nian ne’ebé mak lalais liu no di’ak-liu para bele halo obra ne’e la’o lalais.
Proposta seluk ne’ebé aprova ona mak autoriza despeza kona-ba ezekusaun obra ba konstrusaun estrada entre postu administrativu Uatulari, munisípiu Viqueque bá Laisorulai, munisípiu Baucau, ho estensaun estrada kilometru 22,527, ho valór estimadu serbisu nian hamutuk millaun $22,7.
Rekorde katak Governu delibera, iha 2021, hodi fó autorizasaun abertura prosedimentu aprovizionamentu konkursu públiku internasionál, hodi sosa no instala ekipamentu kabu submarinu fibra ótika, hosi sidade Darwin no Port Hedland iha Commonwealth Austrália mai Timor-Leste.
Governu prevee milaun $41,588 iha verba Fundu Infraestrutura halo akizasaun ekipamentu informátiku kabu submarinu atubele ezekuta projetu ne’e.
Polítika dada kabu submarinu hosi Darwin mai Timor-Leste nu’udar prioridade Governu ho kooperasaun Governu Canberra, ho objetivu atu eleva kapasidade rede internét iha rai-laran, tanba VIII Governu Konstitusionál iha programa Governu eletróniku (E-Government), ne’ebé bainhira realiza presiza iha liña internét ho lais.
Jornalista: Antónia Gusmão
Editora: Maria Auxiliadora
