DILI, 15 fevereiru 2023 (TATOLI)—Diretór Jerál Sektretariadu Tékniku Administrasaun Eleitorál (STAE), Acilino Manuel Branco, hateten Resensiementu Eleitorál no Atualizasaun Baze Dadus (RE-ABD) ba eleitór sira iha diaspora sei realiza iha konsuladu no embaixada sira-nia fatin, nune’e iha loron 24 fevereiru husu eleitór sira hakat hodi halo resensiementu no atualiza kartaun eleitorál.
Notísia Relevante: Resensiamentu eleitorál iha diáspora sei hahú 24 fevereiru 2023
“Resensiamentu eleitorál no atualizasaun baze dadus iha rai-li’ur nian, ita planea at realiza iha ita-nia konsuladu no embaixada sira iha rai-li’ur, nune’e husu resensia ita-boot nia kartaun eleitorál no atualiza mós inklui eleitór ne’ebé hili vota liuhosi postal voting,” Acilino Manuel Branco hateten ba Agência Tatoli iha nia kna’ar fatin, Caicoli, Dili.
Maibé, nia dehan, STAE mós la taka dalan atendimentu movél hanesan ezemplu iha Austrália sei hala’o iha Darwin, Sidney, Canberra no Melbourne, maibé iha dekretu Governu aprova de’it mak Austrália entaun ekipa sira sei bele halo atendimentu movél iha sidade seluk.
Nia esplika, tenke tau tuir unidade jeográfika ne’ebé destaka sentru iha embaixada no konsuladu iha país ida, nune’e aban bainrua sira bele vota iha fatin refere.
Tanba sentru votasaun sei tau iha konsuladu no embaixada sira, anaunser iha sidade seluk mak iha eleitór barak karik sei estabelese tan estasaun votasaun aleinde tau iha konsuladu no embaixada sira.
“Atendimentu movel no direta ba eleitór iha diáspora hanesan de’it,” nia hateten.
STAE mós halo preparasaun halo koordenasaun ho Ministériu Negósiu Estranjeiru no Kooperasaun (MNEK), Ministériu Justisa (MJ) hosi Dirasaun Jerál Notariadu, ekipa sei dezloka ba nasaun sira hanesan Austrália, Korea Súl, Portugál, Inglatera, Irlandia Norte atu halo atendimentu durante fulan ida.
Hafoin konklu,i sei kontinua ho nia prosesu sira seluk antes loron 30, maibé ho loron eleisaun ne’ebé Prezidente Repúblika dekreta ona, STAE sei halo ajustamentu ba resensiamentu ne’ebé iha tanba tuir lei katak loron 30 antes eleisaun ne’e tenke suspende atendimentu.
Tanba ne’e mak STAE husu MNEK atu aprezenta lista ekipa atu dezloka ba diáspora ba Resensiementu Eleitorál no Atualizasaun Baze Dadus nian.
“Tanba pessoal ne’ebé atu ba ami seidauk hatene na’in hira mak ba hamutuk ho STAE, CNE no parte Notariadu nian. Ami hosi STAE nian mak na’in-14, nune’e husu MNEK atu haruka lista naran dezloka ba diaspora, nune’e semana oin ita bele aranka ona. Tanba iha ne’ebá, ita sei halo buat rua mak ida ita halo resensiementu no atualiza kartaun eleitorál, seluk mak ita mós sei fó informasaun atu rejistu ba iha postal voting karik eleisaun ne’e sei liuhosi postal voting ne’e,” nia dehan.
Bainhira implementa postal voting ne’e, entaun votasaun ba prosesu normál nian taka to’o tuku 20h00 maibé liuhosi portal voting mak sei taka to’o de’it tuku 18h00, nune’e ekipa tékniku bele rekolla no konklui votu sira-ne’e.
Tuir dadus hosi STAE hakatuir, eleitór foun resensiamentu atuliazadu to’o iha fulan-dezembru tinan 2022 ne’e hamutuk 878.786.
Jornalista : Osoria Marques
Editór : Cancio Ximenes
