BOBONARO, 15 fevereiru 2023 (TATOLI)-Vise Ministru Saúde (MS), Bonifacio Mau-Coli dos Reis, kuarta ne’e ofisialmente inaugura sistema purifikasaun Bee Liquited Mineral Servis (LMS) iha Hospital Referál Maliana ne’ebé hetan apoia hosi Organizasaun Mundiál Saúde (OMS).
Iha intervensaun, Vise Ministru Bonifacio Maucoli dos Reis, hatene ohin marka tán etapa importante ida ba Ministériu Saúde, partikularmente ba Hospital Referénsia Maliana ne’ebé hetan apoiu husi Organizaasaun Mundial Saúde ba sistema abastesimentu Bee utiliza sistema purifikasaun Bee liu husi Servisu Minerál Líkidu.
Notísia relevante: HRM rejista pasiente na’in-15 mate iha trimestre daruak
“Nune’e ospitál ne’e bele reduz no minimiza risku moras sira-ne’ebé relasiona ho bee no suporta servisu báziku liuhosi kuantidade bee ne’ebé adekuadu ho sistema purifikasaun bee liuhosi Servisu Mineral Líkidu nune’e bele transforma ka purifika bee fo’er irrigasaun ba bee potável iha Hospital Referénsia Maliana,” nia katak.
Tanba ne’e Maucoli lori VIII governu konstituisionál no Ministériu Saúde nia naran espresa sentidu no profundu gratidaun ba apoiu no kooperasaun kontinua ne’ebé fornese husi Organizasaun Mundiál Saúde.
“Espera katak ho fasilidade sira-ne’ebé iha, ita-boot sira bele hakmaan imi-nia prestasaun kuidadu ho dignu no profisionalizmu liután. Maibé iha parte seluk presiza mós tau matan, kuida no halo manutensaun regulár no didi’ak ba ekipamentu sira-ne’e, nune’e bele utiliza iha tempu naruk nia laran,” nia dehan.
Diretór Ezekutivu Hospital Referál Maliana, Bourdaoue Fernandes Moniz, reforsa sistema purifikasaun LMS ne’e rekursu bee mai hosi irrigasaun Maliana I, ne’ebé tranforma bee merak ka fo’er sai ba bee hodi konsumu.
“Ha’u hanoin ida ne’e foin foin primira vez iha Timor-Leste, maibé ohin loron seidauk bele hemu tanba sei iha prosesu ezaminasaun ba laboratóriu, maibé aban bainrua tau fatin ualu iha ne’e, família ho pasiente sira mai baixa iha ospitál bele loke hemu direitamente, la presiza sosa tanba ne’e ita agradese tebes ba apoiu hosi OMS,” nia
katak.
Prezidente Autoridade Munisípiu Bobonaro, Ernesto de Oliveira Barreto, sente kontente no agradese ba OMS ne’ebé mak ho laran luak hakarak kontinua apoiu mellora fasilidade saúde sira iha munisípiu Bobonaro inklui fornese bee-moos ba ospitál referál ne’e.
“Tanba Bee ne’e importante tebes, Maliana bee boot, maibé dalaruma udan-boot be’e kotu pasiénsia ospitál ne’e araska, entaun ho sistema bee-moos ne’e bele atende ona ita-nia komunidade sira-ne’ebé ba iha ospitál, la presiza la’o ba buka iha dook ona,” nia dehan.
Reprezentante OMS iha Timor-Leste, Arvind Matur, hateten OMS kontinua iha komitmemtu atu apoia Ministériu Saúde no Hospital Referál Maliana no fasilidade saúde iha munisípiu sira seluk.
Purifikasaun bee liuhosi Servisu Mineral Líkidu bele prodús bee ne’ebé seguru liuhosi sistema biolójiku ne’ebé kontaminadu husi fonte bee ne’ebé la seguru hanesan, bee mota, bee debun, irrigasaun, udan-been no bee posu.
Enkuantu purifikasaun Bee LMS bele purifika bee 10m3/oras no mákina ne’e bele purifika voltajen 10,000 litru bee por ora no kontein ona klorin atu hala’o tratamentu bee. Nune’e mós purifikasaun bee LMS kompleta ona ho ninia mákina.
Notísia relevante: MS inaugura fasilidade Covid-19 tolu iha HRM
Jornalista : Sérgio da Cruz
Editór : Evaristo Soares Martins
