DILI, 16 fevereiru 2023 (TATOLI)—Governu liuhosi Ministériu Agrikultura no Peska (MAP) kinta ne’e, distribui no halo lansamentu hodi entrega béro fiberglass ho nia mákina tasi sanulu ba grupu peskadór sanulu hosi munisípiu Dili.
“Ohin ita halo lansamentu distribui béro fiberglass unidade sanulu ho nia mákina tasi ba grupu peskadór sanulu hosi munisípiu Dili,” Sekretáriu Estadu Peska, Elídio de Aarújo, hateten iha serimonia lansamentu ne’ebe halao iha Kampung Alor, Dili, kinta ne’e.
Nia dehan, béro ne’ebe Governu hola distribui ba peskadór sira ne’e tuir planu VIII Governu konstituisionál iha tinan 2021 hodi aloka osan $500.000 hodi sosa béro fiberglass ne’e ho nia mákina 15 PK hamutuk unidade 110 ba munisípiu 11.
“Iha tinan 2022, ita konsege fahe ona 38 ba ita-nia peskadór sira iha munisípiu lima. Ohin ita halo tan lansamentu ba béro unidade sanulu ba ita-nia peskadór grupu sanulu,” nia dehan.
Nia afirma, ba munisípiu Dili iha tinan 2020 fahe uluk ona béro fiberglass unidade 10 no agora distribui tan 10 ba munisípiu Dili. Ida ne’e la inklui Ataúro. Tanba, Ataúro agora sai ona munisípiu ketak.
“Tuir dadus munisípiu Dili iha peskadór hamutuk 700 resin. Ba grupu peskadór rasik 200 resin hosi númeru ne’e ita haree nia kuantidade la to’o maibé apoiu hosi Governu ne’e ba oin sei kontinua fahe tantu Governu foun mai,” nia dehan.
Iha biban ne’e mós nia parte husu ba peskadór sira kuidadu didi’ak ekipamentu ne’ebé Governu fahe tanba liuhosi béro fiberglass sei apoiu ekonómia família nian.
“Apoiu ne’ebé Governu halo la haree ras, maibé ho objetivu hakarak tulun peskadór sira tanba liuhosi imi mak ema bele konsumu ikan. Nune’e husu imi iha terrenu atu haree malu no labele fahe malu tanba buat ruma akontesementu iha tasi laran imi mak sei apoiu malu,” nia dehan.
Elídio hateten, béro fiberglass ne’ebé Governu distribui gratuitamente ba peskadór sira uza maibé bainhira uza mak avaria ida ne’e responsabilidade peskadór nian.
“Husu imi kuidadu béro fiberglass ho nia ekipamentu sira, labele faan ka fó aluga ba ema no tula riturista sira, tanba materiál sira ne’e fó atu fasilita imi. Nune’e, bainhira imi kontra mak Governu foti fó fali ba peskadór sira seluk, tanba númeru peskadór ne’ebé ita rejistu hamutuk 6.678 no grupu peskadór hamutuk 1.210,” nia dehan.
Iha fatin hanesan, benefisiáriu peskadór Salvadór Perreira dos santos, hosi grupu Haburas Juventude Bebobuk, hateten, nia parte kontente tebes bele hetan béro fiberglass hodi fasilita sira halo peska.
“Ida ne’e hanesan hakmaan ba ami-nia moris iha tasi, tanba liuhosi apoiu ida ne’e ami bele sustenta ami-nia moris família nian, no ami mós kompromete sei utiliza ró ida ne’e ho kuidadu,” nia hateten.
Grupu peskadór sanulu hosi munisípiu Dili ne’ebé ohin hetan béro fiberglass mak hanesan, grupu Peskadór Laloran Sei Fila, grupu Peskadór Bairu Kampu Baru/Ailok Laran, grupu Moris Tasi, grupu Kmanek Haburas Tasi, grupu Fitun Tasi, grupu peskadór kooperativu Laloran no seluk tan.
Jornalista : Arminda Fonseca
Editora : Armandina Moniz
