DILI, 16 fevereiru 2023 (TATOLI)—Prezidente Instituto para a Defesa dos Direitos da Criança (INDDICA), Dinorah Granadeiro, sei submete rezultadu diálogu nasionál ne’ebé INDDICA realiza ho tema jerál “Rona ami labarik nia lian hodi asegura no realiza mi nia direitu” ne’e ba Parlamentu Nasionál.
Notísia Relevante: Governu presiza luta garante labarik sira-nia direitu
“Ami sei submete rezultadu diálogu nasionál ne’e ba Parlamentu Nasionál liu-liu Komisaun E no Komisaun G ne’ebé haree asuntu labarik no asuntu edukasaun,” Prezidente INDDICA, Dinorah Granadeiro, hateten ba jornalista sira iha Sentru Konvensaun Dili (CCD), kinta ne’e.
Nia hateten, Komisaun F ho komisaun G konfirma katak komisaun F labele husik hela sira-nia fatin tanba sira tenke finaliza ba lei protesaun labarik joven iha perigu tenke submete ba Xefe Estadu.
“Komisaun G konfirma katak sira mós iha atividade lubuk ida-ne’ebé labele husik hela iha tempu ne’e, tanba semana kotuk Xefe Estadu dekreta ona loron ba eleisaun parlamentár nian oportunu ba kiik oan sira atu ko’alia sira-nia preokupasaun, problema hotu ne’ebé sira enfrenta durante ne’e,” nia dehan.
Nia hatutan, tanba iha diálogu ne’e eskola sira iha Dili laran, eskola públiku, no eskola privadu iha mós partisipante espesiál alin sira mai hosi Tibar, alin defisiénsia sira inklui labarik sira ne’ebé faan dalan ninin, partisipa atu sira rasik hato’o sira-nia preokupasaun, nune’e na’in ulun sira bele rona.
“Membru Governu sira-ne’e maiória mai hosi partidu polítika ne’e oportunidade di’ak sira bele ko’alia sai, tanba bainhira eleisaun jerál ho eleisaun parlamentár INDDICA nia observasaun hatudu partidu polítiku sira sempre útiliza labarik sira-nia atividade hodi konsolida iha kampañia,” nia hateten.
Nune’e, fó hanoin ba na’i-ulun sira atu labele útiliza labarik sira iha eventu partidu polítiku, aleinde ne’e mós fó hanoin ba na’in-ulun sira bainhira ukun karik tenke tau prióridade ba asuntu labarik.
Reprezentate UNICEF iha Timor-Leste, Bilal Durrani, hateten intensaun bolu líder atuál sira sira hotu mai atu bele rona labarik sira-nia preokupasaun, nune’e iha kampaña eleitorál ne’e asuntu labarik sai sira-nia matéria kampaña.
“Ha’u hakarak aproveita oportunidade atu bolu lider atuál sira hotu no sira hotu mak rona hodi partisipa iha eleisaun mai ne’e, atu tau asuntu direitu labarik nu’udar asuntu sentrál iha sira-nia manifestu sira no konkretiza promesa sira bainhira eleitu,” nia rekomenda.
Nune’e, nia promete UNICEF ho nia parseiru sira hanesan Governu Japaun, sei kontinua apoiu Governu Timor-Leste nia servisu hodi alkansa progresu ba labarik sira iha Timor-Leste.
“Ami sei la deskansa to’o labarik sira hotu iha Timor-Leste, goza ona sira-nia direitu hotu,” nia dehan.
Entretantu, partisipa iha diálogu ne’e mak Prezidente Repúblika, José Ramos Horta, Vise Ministru MSSI, Signi Chandrawati Verdial, Sekretáriu Estadu Igualidade no Inkluzaun (SEII), Maria do Rosário Fátima Correia, inklui parseiru dezenvolvimentu hotu no estudante sira hosi ensinu primária primeiru siklu to’o nivél ensinu sekundáriu no mós organizasaun ema ho defisiensia sira.
Notísia Relevante: PN aprova projetu-lei protesaun ba labarik iha finál globál
Jornalista : Osoria Marques
Editór : Cancio Ximenes
