PR Horta husu Governu tenke tau orsamentu prioridade ba labarik
DILI, 16 fevereiru 2023 (TATOLI)—Prezidente Repúblika, José Ramos Horta, husu Governu atu tau orsamentu prioridade ba labarik sira iha Timor-Leste tanba sira mak futuru nasaun nian.
Notísia Relevante: PN aprova projetu-lei protesaun ba labarik iha finál globál
“Husu Governu atu tau orsamentu prioridade ba labarik sira iha Timor-Leste,” Prezidente Repúblika, José Ramos Horta, hateten kestaun ne’e liuhosi nia diskursu bainhira partisipa iha diálogu nasionál ho tema “Rona ami labarik nia lian hodi asegura no realiza ami-nia direitu” iha Sentru Konvensaun Dili (CCD), Caicoli, kinta ne’e.
Nia hatutan. programa estratéjiku polítiku ba kosok-oan no inan sira ba edukasaun relasiona ona ho kosok-oan sira ne’e mak prioridade, la’ós de’it tau orsamentu boot, orsamentu importante maibé planeamentu mak tenke la’o ho didi’ak no tau ema di’ak iha instituisaun no halo parseria di’ak entre Governu ho komunidade internasionál, liu-liu edukasaun infantil no nutrisaun.
“Orsamentu tenke tau prioridade duni ba labarik sira, kosok-oan, juventude. Prioridade ba saida, prioridade edukasaun no ba nutrisaun. Nutrisaun mai hosi ne’ebé, mai hosi alimentasaun signifika tau osan iha agrikultura. Programa merenda eskolar, ha’u hanoin labarik joven ohin kritika merenda eskolar ha’u mós haree ho matan iha fatin balun, iha hahan ho koto musan balun,” nia dehan.
Xefe Estadu kestiona tanba problema la’ós orsamentu laiha maibé iha programa sira-ne’e iha teoria di’ak loos maibé pratika laiha, tanba orsamentu entrega ba diretór eskola maibé atu sosa sasán ba labarik sira laiha fali.
Tanba ne’e, atu di’akliu ne’e han produtu lokál sira-ne’ebé povu rasik mak kuda hanesan batar, talas, fehuk, no aifuan sira seluk, nune’e bele hasa’e nutrisaun no prevene han hahan importadu liuliu asukarada hanesan Coca Cola, masin-midar no seluk tan.
“Ho ne’e, husu atu promove produtu nasionál no Governu tenke iha matenek investe iha agrikultura,” nia hateten.
Ho nune’e, Prezidente Republika hatene, klaru katak mandatu parlamentu nasionál ida-ne’e falta de’it fulan rua ka tolu, hanesan ema hatene falta fulan neen (6) mós atensaun ladun boot ona ba programa sira.
Xefe Estadu ne’e dehan, Governu halo nia serbisu nafatin ho Governu foun mai ho ema-nia prediksaun ba kotuk ne’e hosi ministru ida ba ministru seluk la halo, embora ida-ne’e importante tebes.
Nia hateten, sé mak mai foun karik simu kargu ministru, no ministru sesante entrega relatóriu kona-ba atividade ne’ebé halo. nune’e Governu foun bele halo kontinua tanba buat balun di’ak presiza kontinua la’ós buat hotu Governu anteriór halo sala.
“Tanba ne’e, Governu foun mai presiza kontinua programa Governu anteriór nian. Nia labele hateten buat hotu ladi’ak,” Xefe Estadu ne’e dehan.
Jornalista : Osória Marques
Editór : Cancio Ximenes
