iklan

JUSTISA, DILI

Arguidu JDC tama prizaun preventiva ba kazu abuzu seksuál ba menoridade

Arguidu JDC tama prizaun preventiva ba kazu abuzu seksuál ba menoridade

DILI, 17 fevereiru 2022 (TATOLI) – Tribunál Distritál Dili (TDD), liuhosi Juiz Titulár Ivan Suritai, sesta ne’e, aplika prizaun preventiva ba arguidu  JDC ne’ebé deskonfia envolve abuzu seksuál ba menoridade.

Notísia relevante:Tribunál adia julgamentu ba suspeitu abuzu seksuál ba minoridade

Advogadu Privadu Miguel Faria, ne’ebé fó asisténsia legál ba arguidu, hateten razaun   juís aplika medida ne’e tanba iha indísiu forte bazea ba deklarasaun arguidu nian ho prova ne’ebé iha sufisiente prienxe rekezitu krime abuzu seksuál ba menoridade ne’ebé previstu iha artigu 177, númeru 2 iha Kódigu Penál Timor-Leste.

Mezmu nune’e iha alegasaun parte defeza nian husu Tribunál atu aplika medida ne’ebé adekuadu ba arguidu.

“Maibé parte defeza sei ko’alia família hodi halo rekursu  ba desizaun ne’e dentru loron 15” Nia hateten ba jornalista sira iha Tribunál Distritál Dili (TDD), Mandarin, sesta ne’e.

Enkuantu iha  primeiru interrogatóriu, parte Ministériu Públiku ne’ebé reprezenta hosi Prokuradór Renato Berenahak, husu Tribunál atu aplika prizaun preventiva.

Enkuantu Polísia Nasionál Timor-Leste (PNTL) liuhosi Departementu Investigasaun Kriminál (DIK), Komandu Jerál PNTL, ezekuta mandadu detensaun hosi Tribunál hodi detein suspeitu ho insiál JdC, tanba envolve iha kazu violasaun seksuál hasoru menoridade ne’ebé previztu iha artigu 177 hosi Kódigu Penál Timor-Leste.

Suspeitu ho inisiál JdC envolve iha krime abuzu seksuál hasoru menoridade iha tinan 2022.

Kazu ne’ebé suspeitu JdC envolve ne’e, nu’udar krime kontinuasaun, tanba ne’e Ministériu Públiku promove ba Tribunál hodi husu mandandu detensaun, nune’e Tribunál hasai mandadu, hodi husu polísia detein suspeitu.

PNTL liuhosi Departementu Investigasaun Kriminál iha tersa (14/2) loraik tuku 17:00 ezekuta mandadu refere, hodi lori suspeitu JdC iha nia rezidénsia Audian, ba sela Komandu PNTL Munisípiu Dili, hodi detein kedan supeitu JdC iha sela detensaun Komandu Munisipiu Dili, hodi kumpre detensaun durante oras 72.

Entertantu, tuir observasaun jornalista Ajénsia TATOLI iha terenu nota katak, ho desizaun ne’e arguidu JdC nia espoza hatudu sentimentu tristeza ho tanis.

Bainhira arguidu sai hosi sala audénsia laran mai iha li’ur, ne’ebé iha liman futu metin ho aljema, no parte Serbisu Investigasaun Kriminál lori kedas ba  estabelesimentu prizionál Becora hodi kumpre prizaun preventiva.

Nune’e arguidu sei kumpre prizaun preventiva no parte autoridade judisiál Ministéiru Públiku hanesan na’in ba titulár asaun penál sei kontinua haklean investigasaun hodi aprezenta julgamentu normál iha tempu tuirmai.

Entertantu, iha prosesu ne’e  arguidu hetan asisténsia legál hosi Advogadu privadu Miguel Faria, Advogada Idalina no Advogadu privadu ida tán.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!