Dekanu foun husu UNTL prevee fundu harii laboratóriu ba FEAH

DILI, 17 fevereiru 2023 (TATOLI)–Dekanu foun Fakuldade da Edukasaun Arte no Umanidade (FEAH), Teodoro Soares, hato’o pedidu ba Prezidente Konsellu Jerál no Reitór Universidade Nacional Timor Lorosa’e atu tinan oin prevee fundu hodi harii laboratóriu tolu no coby house ida hodi apoiu atividade ensinu aprendizajen ba estudante sira.

Notísia Relevante: Reitór UNTL husu Dekanu FEAH eleitu hatudu responsabilidade

“Ha’u lori FEAH nia naran hato’o pedidu ne’e ba UNTL liuhosi Prezidente Konsellu Jerál no Reitór UNTL atu iha tinan haat ne’e bele instalasaun mós Laboratóriu báziku ida ba Siénsia Naturál. Tanba sentimentál duni bainhira dosente sira iha fakuldade ne’e hanorin matéria Fízika, Kímika, Biolojia maibé ho teoria de’it durante ne’e laiha atividade pratika ida ba estudante sira, tanba ne’e sai difikuldade boot ida ba ami,” Teodoro Soares hateten iha nis diskurdu hafoin simu nu’udar dekanu FEAH UNTL iha salaun Auditóriu Liceu, sesta ne’e.

Tanba, nia dehan, iha aspetu balun presiza hato’o duni ba Prezidente Konsellu Jerál no Reitór UNTL hahú agora, tanba nia hakarak durante ninia mandatu ba tinan ne’e tenke iha buat balun mak hetan tulun hosi Universidade ida-ne’e, atu lori progresu ba Fakuldade Edukasaun Arte no Umanidade ba oin.

Durante ne’e dosente sira iha FEAH bainhira atu hala’o pratika ba matéria sira husu apoiu hodi uza hela laboratóriu hosi fakuldade Ekonomia ninia hodi hala’o pratika, ida-ne’e xoke boot ida ba FEAH maibé dekanu no dosente sira nafatin fó korajen ba malu atu la’o neineik hodi bele atinje meta ne’ebé iha.

Nia husu mós ba UNTL atu bele instala tan Laboratóriu ida ba lingua nian tanba iha FEAH eziste departamentu ho lingua tolu ingleza, portugeza no tetun maibé to’o agora laboratóriu de’it mós laiha.

Ezemplu, nia hateten, iha tinan hitu ba kotuk FEAH iha tape recorder barak loos atu apoiu estudante sira maibé agora sasán sira ne’e laiha hotu ona.

“Ha’u ko’alia ona ho diretór INC maibé nia dehan aat hotu ona, entaun ha’u husu ba universidade aproveitamentu ho prezensa Prezidente no Reitór nian iha serimónia tomada de pose ha’u nian ne’e, atu bele halo esforsu oinsá atu tinan oin bele investe fila-fali ba FEAH ho fasilidade sira-ne’e,” nia dehan.

Nia mós informa, fakuldade Edukasaun Arte no Umanidade ninia orientasaun atu prepara profesór ho kualidade ba futuru hodi nune’e bele reforsa prosesu dezenvolvimentu edukasaun iha Timor-Leste, tanba ne’e tempu to’o ona universidade tenke harii mós laboratóriu Micro Teaching ida ba profesór sira iha fakuldade ne’e.

“Ha’u halo ona vizita ba universidade privada balun, ha’u haree sira iha laboratóriu hanesan ne’e maibé ita seidauk iha karik iha ha’u-nia mandatu tinan haat ba oin ne’e, ha’u husu magnifiku reitór bele estabelese laboratóriu Micro Teaching ida iha Fakuldade ne’e atu tulun kandidatu profesór sira bele repara an ho di’ak liután,” nia hateten.

Karik tinan oin UNTL bele tau fundu ruma atu konstroi Laboratóriu no edifísiu foun ba Fakuldade ida-ne’e bele tulun liután dezenvolvimentu ba UNTL, tanba ezisténsia FEAH nian kuaze tinan 20 liu ona, daudaun ne’e FEAH iha departamentu 10 inklui estudante hamutuk 15.000-resin maibé ativu iha 9.000-resin.

Reitór Universidade Nacional Timor Lorosa’e (UNTL), João Soares Martins, konsidera pedidu Dekanu ein forsada Teodoro Soares nian ne’e pertinente duni, tanba atu garante kualidade ida iha UNTL ne’e infraestrutura mós tama iha kategoria ne’e mos, tanba ne’e UNTL iha responsabilidade boot atu apoiu hodi hadi’a kondisaun di’ak ba fakuldade sira.

“Pedidu kona ba laboratóriu ne’e sai atensaun boot ba estrutura Universidade ida-ne’e iha ita-nia previzaun estatutu foun ba futuru sei iha dirasaun Laboratóriu, tanba ne’e ita sei tau atensaun ba pedidu ida-ne’e ne’ebé seidauk ba oin,” nia dehan.

Reitór ne’e garante katak atu di’ak liu mak laiha maibé durante tinan haat ba oin ne’e, sira sei halo mudansa ruma iha UNTL ne’e atu lori fakuldade sira bele prepara an ho di’ak liután.

Jornalista : Tomé Amado

Editór       : Cancio Ximenes