iklan

NASIONÁL, EKONOMIA, HEADLINE, POLÍTIKA

Governu lansa báskula-ponte ba karreta tula sasán iha fronteira Batugadé

Governu lansa báskula-ponte ba karreta tula sasán iha fronteira Batugadé

Lansamentu báskula-ponte iha Batugadé. Imajen/Antónia Gusmão

BOBONARO, 17 fevereiru 2023 (TATOLI) – Governu liuhosi Ministériu Finansa (MF) halo lansamentu no teste ba báskula-ponte (jembatan timbang) ba tetu karreta ne’ebé tula sasán liuhosi Postu Integradu Batugadé, munisípiu Bobonaro.

“Halo lansamentu nomós halo teste ba ponte ne’ebé mak sei tetu karreta sira ne’ebé mak sei tama bá territóriu Timor-Leste. Teste dahuluk ba ponte tetu ne’e hodi ita hatene katak karreta ne’ebé tula sasán importadu sira ne’e tonelada hira?”, Vise-Ministru Finansa, António Freitas, informa hafoin partisipa iha atividade teste báskula-ponte, iha Batugadé.

Liuhosi báskula-ponte ne’e mós bele identifika karreta sira ne’e tula sasán tonelada hira, nune’e nia todan labele afeta ba estrada diresaun Batugadé-Dili. “Kuandu karreta tula sasán todan liu afeta ba ita-nia estrada”, nia afirma.

Iha tempu badak MF hamutuk ho Ministériu Transporte no Komunikasaun sei aprezenta dekretu-lei ida ne’ebé ko’alia kona-bá tarifa iha Konsellu Ministru. Nune’e, bele rekolla osan hosi karreta sira ne’ebé lori sasán todan hodi afeta ba estrada sira no dezenvolvimentu seluk.

Hafoin halo lansamentu no sei halo teste durante fulan-ida, maibé dadus administrativu kontinua la’o. Tanba durante fulan-ida sei halo sensibilizasaun ba motorista no empreza sira ne’ebé hatama sasán.

Komisáriu Autoridade Aduaneira (AA/Alfándega), José António Fátima Abílio, hateten ho ekipamentu ne’e sei ajuda tebes sira-nia servisu.

“Tanba hosi ne’e bele hatene direta karreta sira ne’e tula sasán tonelada hira? Normalmente, dokumentu tranzasaun ne’e sira mensiona kedas ida laran, maibé ho ponte tetu ne’e ita bele haree ona seraké sira deklara loloos tuir ho dadus ne’e ka sira halo manipulasaun?”, José António realsa.

Nia dehan, bainhira dadus hosi báskula-ponte ho dokumentu ne’e laloos ka sira halo manipulasaun, sei aplika sansaun maka haruka selu liu ka aplika penalidade.

Normalmente, Alfándega identifika todan hosi karreta sira ne’e bazeia de’it ba deklarasaun iha dokumentu ne’ebé karreta sira aprezenta.

Báskula-ponte ba tetu kamiaun sira ne’e sei estabelese mós iha Postu Integradu Salele (Covalima) no Sakato (Oé-Cusse). Ponte ne’e konstrui hosi empreza Mota Loes ho valór orsamentu rihun $139.

Jornalista: Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!