DILI, 17 fevereiru 2023 (TATOLI)—Kompañia ne’ebé Governu kontrata atu halo reabilitasaun ba estrada ligasaun Laga Baguia no Quelicai munisípiu Baucau ba Ossu (Viqueque), daudaun ne’e iha ona terrenu hahú servisu hamoos rai hodi halo reabilitasaun ba estrada refere.
Ministru Obra Públika (MOP), Abel Pires da Silva, hateten, daudaun ne’e kompañia iha ona terenu no husu komunidade afeitadu hotu atu apoiu no kontribui másimu iha prosesu konstrusaun estrada refere.
“Kompañia daudaun ne’e iha ona terrenu hahú hamoos estrada ba reabilitasaun nian. Ha’u husu ba autoridade lokál no komunidade ne’ebé hetan afeitadu hosi projetu ne’e atu koopera no apoiu iha prosesu implementasaun,” Abel Pires da Silva, hateten liuhosi nota komunikadu ne’ebé Agência Tatoli, asesu sesta ne’e.
Notisia relevante : Tempu Besik, Hahú Konstrusaun Estrada Baucau-Viqueque
Kompañia sira dadaun ne’e iha ona terenu halo servisu tanba antes ne’e, membru Governu ne’e rasik mós halo ona kontaktu ho kompaña haat, kontratór ida no konsultór ida ne’ebé halo konstrusaun ba estrada Laga-Baguia. Kontratór ida no konsultór ida ne’ebé halo konstrusaun ba estrada Uaiaka Quelicai Ossu.
“Laga-Baguia mós hanesan, iha sesta (10/02/) liubá ha’u ko’alia ona ho kompañia haat, kontratór rua no rua ne’ebé sei halo supervizaun, kompletu hotu ona. Agora prosesu ba hotu tereñu para halo servisu ne’ebé laiha problema, nomos laiha tan prosesu administrativu ruma atu bele impede. Agora ne’e hein ezekuta de’it ona,” Abel dehan.
Kona-ba indeminizasaun ba komunidade afeitadu, antes ne’e osan transefere ona ba Banku Nasionnál Komérsiu Timor-Leste (BNCTL, sígla Portugués) no hein BNCTL halo pagamentu ba komunidade afeitadu sira.
Konstrusaun ba estrada Laga-Baguia ezekuta hosi kompañia internasionál Norinco International Cooperation Lda, ho orsamentu hamutuk $21.695.194,98 ho durasaun tinan rua nia-laran. Projetu ne’e hetan supervizaun hosi konsultór PT. Inacon Luhur Pertiwi, JV Kai Watu Kmanek Consultant, Unip. Lda, no PT. Sinotech Engineering Indonesia.
Notisia relevante : Estrada Laga-Baguia kompañia preparadu halo konstrusaun
Ba projetu estrada Uaiaka-Quelicai to’o parte balun postu administrativu Ossu nian konstrui hosi kompañia Internasionál Chongqing International Construction Corporation (CICO), ho montante orsamentu $16.547.661,76 ho durasaun tinan ida fulan neen.
Jornalista : Arminda Fonseca
Editora : Armandina Moniz
