Servisu Saúde Covalima deteta tan pasiente HIV na’in-rua iha 2023
COVALIMA, 17 fevreiru 2023 (TATOLI)–Koordenadór Servisu Saúde Munisípiu Covalima, João Ramalho, hateten iha fulan-janeiru tinan 2023 ne’e, Servisu Saúde Covalima deteta tan pasiente HIV na’in-rua iha postu administrativu Suai, munisípiu Covalima.
Notísia Relevante: Servisu Saúde Covalima rejista pasiente HIV/SIDA na’in-rua mate
“Iha janeiru 2023 ne’e, ita deteta tan pasiente HIV na’in-rua ne’ebé kompostu hosi feto-ida no mane-ida, ne’ebé mai hosi postu administrativu Suai iha Covalima,” Koordenadór Programa Servisu Saúde HIV/SIDA, João Ramalho, hateten ba Agência Tatoli, iha Camanasa Suai, sesta ne’e.
Pasiénte HIV na’in-rua ne’ebé sira deteta ne’e liuhosi teste sira-nia raan ne’ebé nia rezultadu pozitivu moras HIV, nune’e daudaun ne’e sira-na’in rua atividade halo tratamentu iha óspital referál Suai.
HIV (human immunodeficiency virus) nu’udar virus ne’ebé estraga Sistema imunidade ema ida-nia isin-lolon no bainhira imuniddae fraku mak isin sai fraku no fasil hetan moras komplikadu oioin, tanba sistema imunidade rezisténsia menus no virus ataka sistema rezisténsia ne’ebé fraku atu kontra moras.
HIV naimhira la kura lalais mak bele hetan moras hanaran AIDS (Acquired immunodeficiency syndrome) no AIDS ne’e stadium ikus hosi infesaun HIV, no iha faze ida-ne’e kapasidade isin-lolon kontra infesaun nee lakon-mohu ona.
HIV bele sai AIDS, tanba bainhira ema ho HIV iha isin to’o tinan barak no estraga ona rezisténsia iha isin-nian ema bele hetan AIDS ne’ebé bele oho ema.
“Tanba ne’e, husu ba públiku iha munisípiu Covalima ne’ebé hela besik iha fronteira bainhira sidadaun ne’ebé halo negósiu liuhosi dalan legál ho ilegál, ida-ne’e risku tebes mai ita-nia munisípiu. Bainhira atu hakat ba mota sorin foku ba negósiu, labele monu ba grupu risku,” nia hateten.
Sidadaun sira-ne’ebé komete iha risku hanesan ba Indonézia bainhira halo relasaun seksuál la uza prezervativu (kondom) maske isin di’ak, maibé tenke hakbesik-an ba fasilidade saúde hanesan sentru saúde no óspital atu hato’o informasaun médika ka enfermeiru sira.
Bazea ba dadus komulativu hahú husi 2012 to’o 2022, pasiente hamutuk 75 no ema hirak ne’e haree ba sira-nia idade maiória idade reprodutiva hanesan 25-44 ne’e hamutuk ema 54 ne’ebé kompostu hosi feto na’in-19 no mane na’in-33.
Jornalista : Celestina Teles
Editór : Cancio Ximenes
