Servisu Saúde Covalima rejista pasiente HIV/SIDA na’in-rua mate
COVALIMA, 15 fevereiru 2023 (TATOLI)–Koordenadór Programa Servisu Saúde HIV/SIDA João Ramalho, informa daudaun ne’e servisu saúde Covalima rejista pasiente HIV/SIDA na’in-rua mate iha 2022.
Notísia Relevante: Timor-Leste rejista pasiente HIV/SIDA 1.704 no mate 271
“Kazu pozitivu HIV/SIDA iha Covalima tinan 2022, ita deteta kazu 10 no hosi númeru na’in-ualu halo tratamentu iha óspital referal Suai, na’in-rua ita la konsege salva nia vida,” João Ramalho hateten ba Agênsia Tatoli, iha nia kna’ar fatin, Camanasa, Ladi, kuarta ne’e.
Pasiente HIV/SIDA na’in-rua la konsege salva sira-nia vida, nia dehan, tanba pasiente na’in-rua halo tratamentu iha óspital referál ho kondisaun ne’ebé grave hosi HIV hakat ona ba SIDA no akompaña hosi moras sira seluk.
Tuir nia, pasiente ne’ebé sofre moras HIV/SIDA iha Covalima ne’e maioria ho idade ne’ebé produtivu.
Tuir dadus tinan 2022 ne’e, rejista pasiéete na’in-10 no hosi númeru ne’e nain–rua la konsege salva sira-nia vida no pasiente na’in-ualu (8) mak ativa hodi halo tratamentu iha Óspitál Referál Suai.
Servisu saúde Covalima kontinua esforsu hasa’e komunidade nia koñesementu hodi halo sensibilizasaun kona-ba moras HIV/SIDA, nune’e bainhira envolve iha grupu risku ruma hakat ba sentru saúde hodi halo teste raan.
“Ami-nia esforsu nafatin hasa’e komunidade nia koñesimentu iha baze, nune’e bainhira komete iha grupu risku ruma no labele hein tan moras grave hakat mai iha fasilidade saúde, maibé tenke hakbesik an sedu hasai raan hodi halo teste sedu, atu bele hatene livre hosi HIV ka lae,” nia hateten.
Pasiénte moras HIV iha munisípiu Covalima pasiénte sira konsentra halo tratamentu iha óspitál Referál Suai, kada fulan médiku sira halo ezaminasaun fíziku hodi fó konseling hodi fó tratamentu hemu ai-moruk ho rútina.
Tuir dadus iha servisu saúde covalima rejista pasiente hahú husi tinan 2012 to’o tinan 2022 hamutuk 75 ne’ebé mai hosi postu administrativu sira hanesan Fatumea, Fatululik, Tilomar, Fohorem, Maucatar, Suai no Zumalai.
Notísia Relevante: 2003 to’o 2022, TL rejista pasiente HIV/SIDA na’in-1.582 no óbitu 278
Jornalista : Celestina Teles
Editór : Cancio Ximenes
