DILI, 26 agostu 2022 (TATOLI)— Tuir dadus estatístika, hahú tinan 2003 to’o juñu 2022, Estadu Timor-Leste liuhosi Insititutu Nasionál Kombate HIV/SIDA, rejista pasiente ema ho HIV/SIDA hamutuk 1.704, hosi númeru ne’e na’in-271 mak lakon vida.
Hosi númeru 1.704 ne’e, pasientene’ebé ativu iha tratamentu hamutuk 871 no ema ne’ebé mak lakon tratamentu no seluk na’in-562 no mate 271.
“Kada fulan númeru pasiente ka ema ho HIV/SIDA foun rejista iha fasilidade saúde sira no númeru kontinua sa’e, tanba konsiénsia ema ida-idak nia sei menus tanba ne’e mak husi tinan 2003 mai to’o juñu 2022 rejista 1.704 no óbitu 271,” Prezidente Instituto Nasionál Kombate HIV/SIDA, I.P, Atanacio de Jesus, hateten ba Jornalista sira iha Matadoru-Dili, sesta ne’e.
Tuir nia pasiente ka ema ho HIV/SIDA ne’ebé lakon tratamentu ne’e tanba do’ok hosi fasilidade no mós dalabarak sira hemu ai-moruk la rutina.
Maibé, daudaun ai-moruk sira ne’e lori besik ona ba fasilidade saúde hanesan sentru saúde no postu saúde, atu nune’e sira bele konsumu regular.
Atu kombate HIV/SIDA, nia dehan meiu dahuluk mak halo sesibilizasaun informasaun ba sidadaun hotu atu iha konsénsia proteje nia-aan ka hases-aan husi risku sira ne’e.
HIV/SIDA mai hosi relasaun seksuál entaun presiza hapara hala’o relasaun seksuál livre no tenke halo relasaun ho parseiru rasik, karik ho ema seluk tenke uza ekipamentu protesaun.
Iha biban hanesan, Komadante Operasaun Nasionál Autoridade Protesaun Sivil, Nuno Romaldo Gomes, hateten, agradese ba Institutu Nasionál Kombate HIV/SIDA,I.P tanba bele hasa’e koñesimentu funsionáriu sira atu prevene-aan hosi risku HIV/SIDA.
“Programa sensibilizasaun ne’e foin mak inisia espera katak ba futuru membru hotu husi Autoridade Protesaun Sivil tenke iha koñesimentu ida kona-ba moras HIV/SIDA, atu sira bele prevene-aan,” nia agradese.
Tanba, funsionáriu Autoridade Protesaun Sivíl hamutuk 2.000 iha nivél nasionál no munisípiu sira.
Iha sensibilizasaun informasaun HIV/SIDA ida ne’e partisipa masimu husi funsionariu Autoridade Protesaun Sivil no entidade sira seluk.
Jornalista : Felicidade Ximenes
Editór : Florencio Miranda Ximenes
