CCI Covalima sei estabelese Asosiasaun Na’in ba Autokarro iha Covalima
COVALIMA, 20 fevereiru 2023 (TATOLI)–Prezidente Kámara Komérsiu Indústria (CCI, sigla portugés) Covalima, José do Rego Carvalho, hateten CCI Covalima sei estabelese asosiasaun na’in ba Auto Karro (bus) Suai-Dili no transporte lokál sira iha Covalima.
Notísia Relevante: Na’in ba Autokarro Suai ezije Governu konstrui terminál iha Covalima
“CCI Covalima sei estabelese asosiasaun na’in ba Auto Karro no trasporte lokál sira-ne’ebé eziste iha Covalima, nune’e atu akumula inspirasaun no haree fasilidade ba pasajeiru no tarifa ba transporte públiku,” José do Rego Carvalho hateten ba Agência Tatoli, iha resintu AMC, Sukaer Laran, segunda ne’e.
Objetivu estabelese asosiasaun refere atu haree liu kona-ba tarifa transporte públiku ne’ebé durante ne’e espalla no haree mós fasilidade hanesan terminál hodi bele fó asisténsia ba pasejeiru sira.
Prosesu atu estabelese asosiasaun na’in ba Auto Karro (bus) sira-ne’e, oras ne’e daudaun la’o hela ne’ebé sei halo identifikasaun dadus, hafoin realiza enkontru ho na’in ba au karro (bus) no transporte lokál sira atu mós kria estatutu no bele la’o tuir regra.
Dadus hosi Dirasaun Transporte no Komunikasaun (DTC) Covalima rejista bus iha Covalima hamutuk 51 ne’ebé durante ne’e halo movimentu Suai-Dili ba-mai.
Notísia Relevante: Governu laiha koñesimentu tarifa transporte públiku Suai-Dili $15.00
Jornalista : Celestina Teles
Editór : Cancio Ximenes
