Governu aloka rihun $250 selebra loron nasionál veteranu
DILI, 20 fevereiru 2023 (TATOLI)—Vise-Ministru Administrasaun Estatál (MAE), Lino de Jesus Torrezão, hateten Governu aloka orsamentu hamutuk rihun $250 hodi selebra loron nasionál veteranu ne’ebé sei selebra iha 03 marsu tinan 2023.
Notísia Relevante: Selebra loron nasionál veteranu ho “hametin unidade ba dezenvolvimentu nasionál”
“Ita aloka orsamentu hamutuk rihun $250 ne’ebé ita fahe hotu ona ba sesaun sira hotu,” Lino de Jesus Torrezão hateten ba jornalista sira, hafoin partisipa enkontru extraordinária iha Palásiu Governu, segunda ne’e.
Iha selebrasaun ne’e, sei iha atividade workshop ne’ebé sei realiza iha Sentru Konvensaun Dili (CCD, sigla portugés) ne’ebé sei mós veteranu sira inklui halo misa.
Atividade sira-ne’ebé atu realiza iha ámbitu Komemorasaun Loron Nasionál Veteranu nian ba dala-VI ne’e sei hahú hosi loron 01 to’o 03 marsu 2023, ho atividade sira-ne’ebé mak komisaun organizadora prepara ona, hahú hosi tarefa kada Senna ne’ebé prepara ona hosi Ministériu Asuntu Kombatente Livertasaun Nasionál (MACLN, sigla portugés).
Seksaun sira-ne’ebé deside ona iha reuniaun preparasaun ne’e mak hanesan sekretariadu, seksaun hosi finansa, protokolu, liturjia, konsumsi, mobilizasaun, lojistika, animasaun, asistênsia médiku, programa no mós sesaun seguransa.
Jornalista : Osória Marques
Editór : Cancio Ximenes
