DILI, 20 fevereiru 2023 (TATOLI) – Governu Timor-Leste sei simu kontribuisaun finanseira ho valor millaun $6 hosi Ajénsia Kooperasaun Internasionál Koreia Súl (KOICA)
Iha reuniaun Konsellu Ministru estraodináriu delibera, tuir projetu ne’ebé aprezenta husi Ministru Finansa, Rui Gomes, atu aprova akordu entre Timor-Leste no KOICA kona-ba projetu ‘Strenghtening the Preparedness and Response to Infectious Disease in Timor-Leste’ ka Fortalesimentu Preparasaun no Resposta ba Moras Infesioza sira iha Timor-Leste.
“Tuir akordu ida-ne’e, KOICA kompromete atu halo kontribuisaun finanseira ida ho montante to’o millaun $6, ne’ebé sei utiliza atu hametin preparasaun no resposta ba moras infesioza ka moras ne’ebé hadaet lalais sira iha Timor-Leste”, Ministru Prezidénsia Konsellu Ministru realsa iha Palásiu Governu.
Fidélis Magalhães salienta verba ida ne’e sei reforsu kapasidade atu deteta, notifika no hatán iha nivel hothotu, tuir tempu ne’ebé loloos ba eventu no surtu sira moras infesioza prioritária sira-nian, nune’e mós liuhusi preparasaun husi espesialista nasionál sira ba iha área ida-ne’e.
Konsellu Ministru dezigna Ministru Finansa atu reprezenta Governu Timor-Leste hodi asina akordu ne’e.
Notísia relevante: KOICA kontribui millaun $5,998 implementa projetu YEES
Jornalista: Antónia Gusmão
Editora: Maria Auxiliadora
