MD sei rekruta membru F-FDTL ofisiál na’in 80-resin iha fulan oin
DILI, 21 fevereiru 2023 (TATOLI)—Ministru Defeza (MD), Filomeno Paixão de Jesus, informa ministéiru sei loke rekrutamentu ba membru FALINTIL-Forsa Defeza Timor-Leste (F-FDTL) foun ba ofisiál hamutuk na’in 80-resin iha fulan oin tinan ne’e.
Notísia Relevante: Komandu F-FDTL sei halo rekrutamentu rejime espesiál iha 2023
“Atu rekruta duni forsa maibé rekrutamentu espesiál liu 80, sira ne’e okupa ba ofisiál hodi okupa espesialidade téknika iha F-FDTL nia laran. Ezemplu, médiku, enjinéiru, topográfu, komunikasaun no iha fatin seluk ne’ebé ita presiza. Agora seidauk ita haree took fulan oin (loke rekrutamentu),” Ministru Defeza, Filomeno da Paixão de Jesus, hateten ba jornalista sira hafoin ramata enkontru ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite, tersa ne’e.
Iha parte seluk, durante enkontru Ministru Defeza aprezenta ba Xefe Estadu kona-ba dezenvolvimentu iha área defeza no F-FDTL.
“Ohin, ami enkontru ho Prezidente Repúblika atu informa liu-liu kona-ba dezenvolvimentu ne’ebé hala’o iha defeza no F-FDTL durante tinan 2018 até agora iha governasaun VIII Governu Konstitusionál,” nia dehan.
Governante ne’e dehan, progresu ne’ebé iha mak dezde asume hanesan Ministru Defeza ita haree katak dezenvolvimentu ne’ebé hala’o kontinua hosi 2018 ne’ebé halo planeamentu foun hasai diretiva ministeriál foun, hodi halo planeamentu estratéjiku militár ba F-FDTL hodi define misaun, reestudu ba misaun, halo estudu ba sistema forsa, kria sistema forsa hodi haree nia dispozitivu fahe ba Timor laran tomak.
Durante enkontru, Prezidente Repúblika simu fó diretiva no orientasaun haree ba planeamentu ba oin sustentabilidade, kultura manutensaun, dixiplina, bein estár forsa sira-nian.
Jornalista : Nelson de Sousa
Editór : Cancio Ximenes
