DILI, 21 fevereiru 2023 (TATOLI)—Governu liuhosi Sekretária Estadu Ambiente (SEA) halo ona tara-bandu ba suku liu 100 iha territóriu laran ho objetivu hodi proteje biodiversidade hahú hosi animál tasi, rai maran, ai-horis, inklui ba flora no fauna.
“Ko’alia kona-ba atu projete ita-nia biodiversidade inklui flora no fauna, ita halo ona tara-bandu ba suku liu 100 iha territóriu laran, ho objetivu eduka no bandu ema labele estraga ita-nia biodiversidade,” Diretór Biodiversidade iha Sekretária Estadu Ambiente, Rui dos Reis dehan ba Agência Tatoli, iha nia-knaar-fatin, Bebora, Dili, tersa ne’e.
Nia dehan, Governu ninia objetivu halo tara bandu atu proteje biodiversidade iha Timor-Leste liuliu mós ba flora no fauna. Tanba tara-bandu ne’e rasik hanesan instrumentu kulturál ida ne’ebé Governu adopta hodi tau ukun no bandu bazeia ba kultura.
Notisia relevante : MAP halo ona programa tara bandu hodi proteje biodiversidade tasi
Nia dehan, tara-bandu ne’e mosu inisiativa maihosi komunidade no autoridade lokál sira. Tanba sira sente sira-nia hela fatin nesesita duni halo tara-bandu hodi bele proteje rikusoin Timor-Leste nian nune’e ema labele estraga.
“Iha tara-bandu ne’e nia intensaun tolu mak atu regula ema ho ema. Katak labele viola ema-nia direitu, regula ema ho natureza hodi labele estraga ita-nia rikusoin tuir hakarak, no ikus regula ema ho Estadu. Katak lei ne’ebé Estadu tau ita tenke kumpre no hakruuk tanba lei refere hodi regula ita-nia hahalok,” nia dehan.
Diretór ne’e hateten, hafoin tara-bandu sira ne’ebé iha hatudu rezultadu di’ak tanba ema ne’ebé halo atividade hanesan estraga ai-horis protejidu, kasa aminál fuik no seluk tan iha maibé nia númeru hahú menus.
“Husu ba públiku liuhosi tara-bandu ne’ebé tenke respeita ita-nia kultura, labele estraga ita-nia rikusoin sira ne’ebé iha tanba bainhira ita kuidadu ita-nia biodiversidade nia vantajen liuliu animál fuik sira bele moris kontente no la fasil lakon leet de’it,” nia dehan.
Jornalista : Arminda Fonseca
Editora : Armandina Moniz
