Xefe suku sira presiza habelar lialoos ba Povu iha tinan polítiku
BOBONARO, 21 fevereiru 2023 (TATOLI) – Vise-Ministru Administrasaun Estatál (MAE), Lino de Jesus Torrezão, husu ba xefe suku sira iha munisípiu Bobonaro atu hato’o lialoos ba povu ligadu ho dezenvolvimentu ne’ebé VIII governu implementa iha munisípiu kobre to’o aldeia sira iha área rural, liuliu programa Uma Naroman ba Povu (UNP).
Nia subliña, pozisaun VIII governu konstistuisionál mak mak programa ne’ebé mak hatún mai to’o aldeia sira-ne’e hodi governasaun ne’ebé lideradu hosi Primeiru Ministru Taur Matan Ruak, atu kria kondisaun dignu ba komunidade no responde preokupasaun ne’e enfrenta durante ne’e.
Notísia relevante: Governu inaugura edifísiu foun administrasaun postu Bobonaro
“Ha’u sempre husu beibeik ba xefe suku sira atu habelar lialoos ba povu sira, labele habelar lia bosok. Lialoos mak prinsipál, agora ne’e ita komesa ona tama tinan polítiku,” nia hato’o mensajen ne’e iha ámbitu inaugurasaun edifísiu foun postu administrativu Bobonaro, segunda ne’e.
Nia dehan, bainhira hasoru eleisaun lejizlativa, autoridade lokál sira hato’o saida mak bele ko’alia, la’ós hatete fali lia bosok ba komunidade sira.
Nia fó ezemplu, lia bosok mosu duni tanba foin dadaun akontese iha munisípiu balun, iha ema balu foti fali bandeira partidu polítiku seluk nian, dada sa’e fali iha Uma Naroman ba Povu ne’ebé konstrui hosi VIII governu liuhosi Orsamentu Jerál Estadu.
“Ida-ne’e mak dehan lia bosok ne’e, tanba ita halo tiha peskiza no levantamentu ida, afinál ema ne’e la normál, defisiente, depois virál los iha facebook dehan, Ministériu Administrasaun Estatál hapara ona konstrusaun ne’e tanba de’it dada bandeira partidu balun iha uma leten, maibé lae,” nia katak.
Notísia relevante: Governu presiza luta garante labarik sira-nia direitu
Jornalista : Sérgio da Cruz
Editór : Evaristo Soares Martins
