DILI, 23 fevereiru 2023 (TATOLI)—Ministériu Asuntu Kombatente Libertasaun Nasionál (MAKLN), Júlio Sarmento “Meta Mali”, hateten kona-ba monumentu 12 Novembru posivél bele suspende atividade konstrusaun ne’e tanba konstrusaun ne’e prolonga ba dala-rua ona maibé kontinua la’o lentu.
Notísia Relevante: Komité 12 Novembru rekomenda MAKLN fó atensaun ba kompañia finaliza “Monumentu 12 Novembru”
“Prosesu konstrusaun monumentu 12 Novembru ne’e ha’u halo moris kontratu dala ida tan ona iha 2023, maibé dala ruma bele mate tan. Tanba ninia obra la’o magame to’o agora. Sira-nia prosesu konstrusaun la’o hela maibé lentu liu,” Júlio Sarmento “Meta Mali” hateten ba Agência Tatoli, iha nia kna’ar fatin, Caicoli, kinta ne’e.
Tanba ne’e, nia dehan, MACLN sei foti medida hasoru empreza ne’ebé sai manán-na’in ba obra ne’e.
“Ha’u sei buka meiu oinsá ko’alia ho jurista sira atu fó paresér ruma, nune’e foti medida hasoru konstrusaun monumentu 12 Novembru. Tanba aumenta tan mai 2023 ne’e, presiza foti medida imediatamente, se lae abuza konfiansa,” Meta Mali hateten.
Projetu ne’e ezekuta hosi empreza Bobolait Unipesoál, Lda, ho orsamentu millaun $1,385, ne’ebé tuir kontratu konstrusaun hahú iha loron 23 setembru 2021no sei konklui iha loron 22 setembru 2022, maibé tanba seidauk konklui entaun Governu hanaruk kontratu konstrusaun to’o tinan 2023.
Notísia Relevante: Monumentu 12 Novembru sei sai roteiru istóriku no turístiku
Jornalista : Osória Marques
Editór : Cancio Ximenes
