Primeiru-Ministru auzente iha reuniaun ho Prezidente Horta tanba seidauk tama serbisu
DILI, 23 fevereiru 2023 (TATOLI) – Primeiru-Ministru, Taur Matan Ruak, la partisipa iha reuniaun semanál ho Prezidente Repúblika, José Ramos Horta, tanba seidauk tama serbisu hafoin fila hosi vizita traballu bá Indonézia no Singapura.
Tuir ajenda Prezidente Repúblika nian katak, iha kinta dadeer tuku 09h30, iha enkontru semanál ho Xefe Governu, maibé auzente.
“Primeiru-Ministru la partisipa [iha enkontru] tanba foin fila hosi vizita traballu bá Indonézia no Singapura, iha kuarta (22/02)”, Porta-voz Governu, Fidélis Magalhães, klarifika iha Palásiu Governu, hafoin reuniaun Konsellu Ministru.
Governante ne’e esplika katak Xefe Ezekutivu sei hahú hikas ninia knaar hanesan baibain iha segunda semana oin.
Nia salienta iha reuniaun Konsellu Ministru ne’ebé realiza iha kinta ne’e prezide hosi Vise-Primeiru-Ministru, José Reis.
Lembra katak Primeiru-Ministru hala’o vizita ofisiál bá Indonézia, entre 11 no 14 fevereiru, no hasoru malu ho Prezidente Jokowi hodi diskute kona-ba kooperasaun bilaterál no kontinua kedan nia viajen bá Singapura hodi hasoru malu ho nia omólogu, Lee Hsien Loong, hodi aborda asuntu sira kona-ba apoia Timor-Leste ba adere ASEAN no kooperasaun téknika ba planu urbanizasaun nian.
Notísia relevante: Vizita Singapura, Matan Ruak no Lee Hsien Loong ko’alia asuntu importante rua
Jornalista: Antónia Gusmão
Editora: Maria Auxiliadora
