2023: MACLN fó prioridade ba dadus pendente 2003-veteranu rejistadu 2009

DILI, 24 fevereiru 2023 (TATOLI)—Ministru Asuntu Libertasaun Nasionál (MACLN, sigla portugés), Júlio Sarmento “Meta Mali”, hateten, tinan ne’e MAKLN tau prioridade ba dadus pendente 2003 no dadus veteranu rejistadu 2009 nian.
Notísia Relevante: Posibilidade Governu foun mak sei halo validasaun dadus veteranu rejistadu 2009
Nia hatutan, nia parte sei tenta hafoin liu tiha selebrasaun loron nasionál veteranu iha 03 marsu, maibé entre dadus pendente 2003 ho dadus rejistadu 2009 sei tau prioridade dahuluk iha mandatu rohan ne’e, nune’e bele konklui.
“Ida pendente ne’e kuaze 4.000 mak sei iha hela, ne’ebé asuntu rua ne’e importante no tau prioridade hotu. Maibé interrese mak ida-idak tenke reforsa ho testemuña, nune’e bele solusaun ne’ebé hakonu duni no tuir saida mak durante sira kontribui,” Meta Mali hateten ba Agência Tatoli iha nia kna’ar fatin, Caicoli, kinta ne’e.
Meta Mali hateten, dadus ida-ne’e iha tinan 2003 nian maibé labele simu tanba sira sente katak sira la merese ho grau ne’ebé fó.
“Entaun haruka CCLN ho SEACLN sira atu aselera kestaun ne’e. Mandatu Governu ne’e nian besik ramata ona, maibé ita nafatin esforsu tuir kapasidade ne’ebé ami iha, karik la konklui Governu tuir mai mak sei rezolve,” nia hateten.
Maibé kona-ba dadus veteranu rejistadu 2009 nian hein konvoka reuniaun nasionál ikus nian ne’ebé sei konvida Komisaun Munisipál sira atu haree no ida-ne’e maizimenus fulan ida hodi bele determina, nune’e bele taka sai iha postu no suku sira iha Timor-Leste.
“Ida-ne’e planu bainhira ha’u fila hosi rai-li’ur mak atu realiza maibé parte Konsellu Veteranu adi’a tiha katak depois eleisaun liu tiha lai, entaun ha’u labele halo buat ida. Administrativamente ministériu nian no teknikamente Konsellu Veteranu nia obra. Tanba sé mak merese no lae ba direitu ne’e, Konsellu Veteranu mak hatene,” nia hateten.
Dadus rejistadu 2009 ne’e atinje ona 80% no hela 20% mak seidauk konklui, signifika ekivalente ba ema mak 118.000 hosi totál veteranu 124.680.
Liuhosi konteúdu ne’ebé mensiona iha Estatutu Kombatente Libertasaun Nasionál, lei númeru 3/2006, no artigu 13 hateten Registo da Qualidade de Combatente da Libertação Nacional sei kontinua hala’o validasaun rejistu ba períodu daruak nian ba rekoñesimentu Kombatente hanesan Libertasaun Nasionál ne’ebé rejista iha tinan 2009.
Notísia Relevante: Verifikasaun dadus veteranu rejistadu 2009 atinje ona 62%
Jornalista : Osória Marques
Editór : Cancio Ximenes

