DILI, 03 fevereiru 2023 (TATOLI)–Prezidente Konsellu Kombatente Libertasaun Nasionál (CCLN-sigla portugés), Vidal de Jesus “Riak Leman”, hateten kona-ba dadus veteranu rejistadu tinan 2009 ne’ebé halo daudaunn verfikiasaun ne’e, posiblidade Governu foun mai mak sei halo validasaun tanba besik ona kampaña eleitorál.
Notísia Relevante: Verifikasaun dadus veteranu rejistadu 2009 atinje ona 90%
“Ha’u hanoin governasaun foun mak sei hatutan karik tanba durante prosesu verifikasaun ne’e ita iha obstakulu dahuluk mak pandemia COVID-19 no agora ita atu halo validasaun, maibé verifikasaun seidauk hotu no depois ita besik atu tama tan ona ba kampaña eleisaun parlamentar tinan ne’e,” Riak Leman hateten ba Agência Tatoli liuhosi telefónika, sesta ne’e.
Loloos ne’e, tuir nia, tinan 2023 ne’e halo validasaun ba dadus veteranu rejistadu 2009 nian maibé to’o agora verifikasaun mós seidauk konklui.
“Ita halo verifikasaun ne’e seidauk hotu no ita foin konklui mak 75% (93.000) no 25% seidauk. Agora ekipa verifikadór atu tun maibé la kle’ur tan Prezidente Repúblika atu dekreta ona kalendáriu kampaña ba eleisaun parlamentár nian. Ita sei labele halo buat ida tanba daudaun ne’e mós ita-nia Ministru Asuntu Kombatente Libertasaun Nasionál, Júlio Sarmento “Meta Malik”, ho nia diretór jerál MAKLN halo tratamentu saúde iha rai-liur,” nia dehan.
Riak Leman hateten, dala ruma eleisaun parlamentár liu tiha lai mak foin halo validasaun nasionál, entaun planu halo validasaun ne’e sei adianta tanba veteranu sira hotu sei partisipa iha kampaña.
Tuir dadus, veteranu iha territóriu nasionál ne’ebé mak rejistu iha 2009 no ekipa verifikadór sira halo verifikasaun ne’e hamutuk 124,680.
Iha Estatutu Kombatente Libertasaun Nasionál, lei númeru 3/2006 iha artigu 13 ne’e hateten ‘registo da Qualidade de Combatente da Libertação Nacional sei kontinua hala’o validasaun rejistu ba períodu daruak nian ba rekoñesimentu Kombatente hanesan Libertasaun Nasionál ne’ebé rejista iha tinan 2009.
Notísia Relevante: Verifikasaun dadus veteranu rejistadu 2009, falta Railaco mak seidauk konklui
Jornalista : Osória Marques
Editór : Cancio Ximenes
