OÉ-CUSSE 24 fevereiru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, enkoraja setór privadu sira iha Oé-Cusse, atu prepara-aan ba futuru implementasaun zona komérsiu livre iha liña fronteira entre Repúblika Indonézia no Timor-Leste.
“Setór privadu, ha’u agradese ba Irmão Timor tanba investe ona iha transporte marritima, maibé ha’u hanoin tinan ne’e ba oin, kompetisaun ne’e sei maka’as, tanba saida, iha semana kotuk, Prezidente Indonézia ho Primeiru Ministru Timor-Leste asina ona akordu ba free zona trade,” Arsénio Paixão ko’alia iha ámbitu konferénsia CCI-TL Oé-Cusse iha otél Oé-Upun, kinta ne’e.
Nia informa, iha akordu ne’e define ona, hosi área Timor-Leste iha Oé-Cusse hosi liña fronteira Sakato mai ho distánsia kilómetru 10, nune’e mós hosi liña fronteira Wini ba Kefamenanu TTU to’o Atapupu kilómetru 10 sei sai zona komérsiu livre.
“Entaun setór privadu tenke organizadu no prepara-aan, organiza ba atu dezenvolve an, nu’udar setór privadu ita-boot sira laiha opsaun, ema sei mai ho osan barak, mai ho tékniku maka’as, Oé-Cusse oan tenke iha dalan ida de’it, organiza-aan hamutuk ko’alia beibeik, nune’e ita bele iha balansu,” nia fó hanoin.
Nune’e, hanesan Prezidente Autoridade RAEOA, apela, evita trata malu maibé uza oportunidade ba asuntu importante sira kona-bá preparasaun iha futuru implementasaun free zona trade.
“Iha tempu polítika ko’alia iha nia tempu, maibé iha tempu seluk sira-ne’e ita-nia obrigasaun nu’udar Oé-Cusse tenke hahú prepara-aan ona, tanba kompetisaun sei maka’as,” nia tenik.
Ezekutivu ne’e informa, bainhira tama ona implementasaun loloos, ema barak hosi li’ur sei kontaktu beibeik Autoridade atu harii investimentu, entaun setór privadu sira tenke preparadu molok tama ba implementasaun.
Tuir nia, tanba komunidade rasik Autoridade tenke prepara sira hosi liña fronteira mai to’o zona sentrál Pante Makasar, tán ne’e mak iha tinan ne’e Autoridade deside ona estrada nasionál sira tenke mellora daudaun, bee-moos no eletrisidade tenke garantidu.
Notísia relevante: Timor-Leste asina akordu Importante lima ho Indonézia
Jornalista: Abílio Elo Nini
Editór: Evaristo Soares Martins
