CNE louva PLP tanba organizadu no dixiplina

DILI, 25 fevereiru 2023 (TATOLI)—Prezidente Komisaun Nasionál Eleisaun (CNE, sigla portugés), José Agostinho da Costa Belo, hateten Partidu Libertasaun Populár (PLP) hanesan partidu ida-ne’ebé organizadu no dixiplina tanba durante konferénsia hotu iha munisipiu to’o mai nasionál sempre la’o ho susesu no kumpre regulamentu.
Notísia Relevante: Taur husu konfrensista servisu makaas ultrapasa dezafiu iha eleisaun parlamentár 2023
“Durante konferénsia PLP nian iha nivél munisipiu mai to’o nasionál ne’e, organizadu tebes no dixiplina. Ida-ne’e hatudu katak Partidu ida modernu no iha vizaun ida-ne’ebé dook,” Prezidente CNE ne’e hateten iha konferénsia nasionál PLP nian ne’ebé halao iha salaun Mahoka, Dili, sábadu ne’e.
CNE hanesan orgaun independente ida-ne’ebé parseiru importante mak Partidu Polítiku sira la haree ba partidu kiik no partidu boot, maibé partisipa iha eleisaun ida-ne’ebé di’ak no transparante.
“Ami-nia servisu independente, ami nia parseiru mak partidu politiu sira, la hare ba partidu ne’ebé kiik ka boot maibé importante iha vizaun no misaun di’ak atu servi ba rai ida-ne’e. Atu partidu sé de’it mak konkore iha eleisaun, atu manán ka la manán tenke konkore ho di’ak,” nia dehan.
Konferénsia ba partidu politiku ne’e hanesan instrumentu importante ida ka kritéria importante ida atu aprezenta lista kandidatu sira-nian atu hato’o ba Tribunál Rekursu.
Dadaun ne’e, nia dehan, CNE rejista mós partidu sira-ne’ebé estatutu sei moris, balun estatutu la tuir ona kritéria maibé liuhosi konferénsia hanesan mós kriteria ida importante ba Tribunál haree hodi halo verifikasaun.
Alende ne’e, nia informa mós kona-ba relatóriu gastu orsamentu sira subvensaun públika iha duni responsabilidade no utiliza duni ba interrese partidu nian no la’o tuir prosedura ne’ebé iha.
Subvensaun ne’ebé PLP hetan kada kadeira hamutuk rihun $92 no PLP hetan kadeira ualu ho nune’e kada tinan hetan osan hamutuk rihun $736.
Orsamentu hirak ne’e, utiliza ba kontaktu regulár ho kuadru partidu nian no estrutura nasionál, munisipiu to’o postu administrativu tun ba suku no aldeia sira.
Orsamentu subvensaun públiku ne’e utiliza mós orsamentu refere ba formasaun politika atu halo investimentu ba rekursu umanu partidu nian no seluk tan.
Notísia Relevante: PLP uza subvensaun públika ba formasaun polítika
Jornalista : Hortencio Sanchez
Editór : Cancio Ximenes

