Taur husu kuadru sira servisu makaas fó vitória ba PLP
DILI, 25 fevereiru 2023 (TATOLI)–Prezidente Partidu Libertasaun Popular (PLP) Taur Matan Ruak agradese ba kuadru importante hotu ne’ebé troka no balun sai ona ba partidu seluk no husu ba kuadru foun atu servisu makaas, nune’e bele hetan no fó vitoria ba PLP iha eleisaun lejislativa ne’e.
Notísia Relevante: Taur husu konfrensista servisu makaas ultrapasa dezafiu iha eleisaun parlamentár 2023
“Konferénsia munisipiu ne’ebé iha fulan hira ba kotuk kuadru munisipiu nian barak mak troka, sira balun sai ona balu tama fali. Agradese ba sira-ne’ebé sai ona tanba sira nia kontribuisaun mak fó ba PLP kadeira ualu. Ha’u hakarak husu ba imi sira foun, kadeira hira mak atu fó ba PLP ne’e ita hotu tenke servisu makaas hodi bele hetan vitória,” Prezidente PLP ne’e hateten liuhosi diskursu iha segunda konferensia PLP nianne’ebé hala’o iha salaun Mahoka, Dili, sábadu ne’e.
Nia dehan, ho kuadru tuan sira-nia servisu makaas mak fó oportunidade atu hamutuk kaer ukun ho Governu ne’ebé agora la’o hela, hamutuk iha plataforma ne’ebé lidera hosi Sekretariu Jerál Frente Revolusionária do Timor-Leste Independente (FRETILIN), Marí Alkatiri.
“Ha’u iha lista eleitór sira kada munisipiu iha eleisaun tinan 2017 no 2018, ha’u atu haree ita-boot sira foun ne’e servisu ka lae, númeru eleitór PLP nian aumenta ka lae,” nia dehan.
Aleinde ne’e, Taur mós hato’o agradesimentu ba Prezidente Interinu PLP, Abrão Freitas “Mate Restu”, ne’ebé durante ne’e lidera hela partidu to’o ohin loron.
“Agradese ba Prezidente Interinu, ita-boot nia servisu makaas tebes, durante ha’u-nia aujénsia ita lidera hela partidu to’o ohin loron. Agora, ita hakat hamutuk ba oin hodi hasoru eleisaun ne’ebé sei mai,” Taur hateten.
Jornalista : Hortencio Sanchez
Editór : Cancio Ximenes
