DILI, 26 fevereiru 2023 (TATOLI)– Ezekusaun reál Orsamentu Jerál Estadu (OJE) 2023 ba Todo Governo, esklui Kompromisu no Obrigasaun sira, to’o loron 24 fevereiru 2023 ein termu nominál atinji ona millaun $87,6 husi totál orsamentu aprovadu biliaun $2,16.
“Ezekusaun Todo Governo a’as liu mak iha liña ministeriál ne’ebé ezekuta ona millaun $66,9 husi orsamentu alokadu biliaun $1,2. Tuir kedan ho Ajénsia Autónoma ho nia ezekusaun atinji ona millaun $15,2 milhões husi orsamentu alokadu $218,3. Autoridade Munisipál ezekuta ona millaun $3,4 husi orsamentu alokadu millaun $81,3. Enkuantu RAEOA ezekuta ona besik millaun $1 husi orsamentu alokadu millaun $84. Fundu Dezenvolvimentu Kapitál Umanu ezekuta ona rihun $700 husi orsamentu alokadu millaun $17,8”, relata nota ne’ebé agência Tatoli simu, domingu ne’e.
To’o iha inísiu fulan-fevereiru 2023, Ministériu Finansa foti ona osan husi Fundu Minarai ho montante millaun $300 husi totál orsamentu biliaun $1,3 ne’ebé mak Parlamentu Nasionál aprova ona liuhusi Lei OJE 2023.
Tinan kotuk Governu foti osan husi Fundu Minarai hamutuk biliaun $1,4 ka 90% husi totál biliaun $1,55 ne’ebé mak Parlamentu Nasionál aprova liuhusi Lei OJE Retifikativu 2022.
“Montante biliaun $1,55 ne’e esklui ona Fundu Kombatente Libertasaun Nasionál biliaun $1 ne’ebé mak tinan kotuk Tribunál Rekursu deklara Inkonstitusionál no automatikamente eliminadu husi konta públika”, nota refere.
Husi 2018 to’o 2022, Governu da-ualu foti ona osan husi Fundu Minarai hamutuk biliaun $5,4 husi totál biliaun $7,1 ne’ebé mak aprovadu husi Parlamentu Nasionál. Signifika iha poupanças ka diferensa biliaun $1,7 entre levantamentu aprovadu husi Parlamentu Nasionál no levantamentu atuál.
Tuir relatóriu trimestrál Fundu Minarai husi Banku Sentrál Timor-Leste (BCTL, sigla portuges) to’o iha dezembru 2022, kapitál Fundu Minarai hamutuk biliaun $17,4 kompara ho fim setembru 2022, biliaun $16,9.
Jornalista : Antónia Gusmão
Editor : Rafael Ximenes de A. Belo
