Covalima sei la komemora loron nasionál veteranu
COVALIMA, 27 fevereiru 2023 (TATOLI)–Prezidente Konsellu Veteranu Munisípiu Covalima, Osório Soares “Mausoko”, hateten Konsellu Veteranu Munisipiu Covalima sei la komemora loron nasionál veteranu iha Covalima, tanba serimónia komemorasaun konsentra iha nasionál.
Notísia Relevante: Riak Leman husu timoroan tau importánsia ba loron nasionál veteranu
“Loron Nasionál Veteranu 3 marsu 2023 agora iha munisípiu Covalima, ita laiha preparasaun tanba ami tun ba Dili tuir sermónia komemorasaun loron nasionál veteranu iha Dili,” Osório Soares “Mausoko” hateten ba Agênsia Tatoli, iha nia-kna’ar fatin, Tabakolot, segunda ne’e.
Komemorasaun loron nasionál veteranu tinan 2023 ne’e ho tema prinsipál “Hametin Unidade ba Dezenvolvimentu Nasionál”, tanba veteranu hanesan parseiru hosi Governu, bainhira ema ruma atu destroi nasaun ne’e veteranu mak sei hamriik iha oin.
Tanba, nia hateten, veteranu hamriik iha Governu nia kotuk nafatin maske Governu halo fallansu oinsá mós, veteranu iha nia kotuk atu Governu labele monu.
Papél veteranu nian mak atu asegura unidade nasionál, kaer metin estabilidade nasionál hodi servisu hamutuk ho Falintil-Forsa Defeza Timor-Leste (F-FDTL) no Polísia Nasionál Timor-Leste (PNTL) hodi hametin relasaun.
Nune’e, atu dignifika veteranu nia moris, foin lalais ne’e Sekretáriu Estadu deside 01 fevereiru maibé adia hikas ba fali 09 marsu mós la konsege, tanba ema hotu okupa hala’o kampaña nune’e atu valida dadus veteranu rejistadu 2009 ne’e hein simu orientasaun hosi ministru.
Nune’e, nia husu joven sira atu hakmatek tanba tempu badak sei komemora loron nasionál veteranu mak joven iha Suai labele tenke hakmatek hodi moris hamutuk asegura Governu bele metin,” nia hateten.
Antes ne’e, iha loron 20 fulan-fevreiru tinan 2023, Vise Ministru Administrasaun Estatál (MAE) Lino de Jesus Torrezão hateten, Governu aloka orsamentu hamutuk rihun $250 hodi selebra loron nasionál veteranu ne’ebé sei selebra iha loron 03 marsu tinan 2023.
Notísia Relevante: Governu aloka rihun $250 selebra loron nasionál veteranu
Iha Konstituisaun RDTL Artigu 11 (Fó valór ba Rezisténsia) iha alinea 1 hateten, Repúblika Demokrátika Timór-Leste rekoñese no fó valór ba povu Maubere nia rezisténsia tinan atus ba atus hasoru dominasaun hosi railiur no mós ba sira hotu ne’ebé fó kontribuisaun hodi luta ba independénsia nasional.
Iha alinea 3 mós haktuir, Estadu asegura protesaun espesiál ba mutiladu funu nian, oan-kiak no mós sira seluk tan ne’ebé fó-an tomak ba luta independénsia no soberania nasionál nian, no proteje mós sira hotu ne’ebé partisipa ona iha Rezisténsia hodi hasoru okupasaun hosi raiseluk, tuir lei haruka.
Bazea ba artigu ida-ne’e mak iha Governu estebelse Dekretu-Lei Nú. 3/2016, ne’ebé Estadu Timor-Leste konsagra loron 3 marsu nu’udar loron nasionál ba veteranu sira.
Estadu deside loron 3 marsu ne’e sai Loron Nasionál Veteranu tanba iha loron 3 marsu 1981, Timor-Leste hahú reorganiza funu ba libertasaun nasional, hafoin baze-de-apoiu rahun.
Data istórika ne’e liga ba Konferénsia Nasionál FRETILIN iha Maubai (Viqueque) no iha loron 3 marsu ho orientasaun hosi membru Comite Central FRETILIN (CCF) sobrevivente na’in-rua, Xanana Gusmão no Ma’Huno, no konferensista sira hili membru CCF na’in-sia (9) foun tan no foti desizaun importante lubuk ida, hodi reorganiza luta libertasaun nasionál iha territóriu tomak.
Hosi konferénsia ida-ne’e mak rezisténsia armada moris fila-fali iha ai-laran no povu hetan fali nia esperansa no halo mundu hakfodak.
Selebrasaun dahuluk ba Loron Nasionál Veteranu ne’e akontese iha tinan 2017. Veteranu no Kombatente Libertasaun Nasionál sira mak kompostu husi frente armada, frente klandestina no frente esterna ka diplomátika.
Jornalista : Celestina Teles
Editór : Cancio Ximenes
