DILI, 27 fevereiru 2023 (TATOLI)— Eletrisidade de Timor-Leste, Empreza Públiku (EDTL,E.P), segunda ne’e lansa ona konkursu públiku internasionál ba enerjia solar 72-85MW ne’ebé harii iha aldeia Uma-Rentau, suku Lifau, postu administrativu Laleia, munisípiu Manatuto.
“Ohin ita hahú lansa ona konkursu públiku kona-ba planta enerjia solar 72MW to’o 85MW ne’ebé ita sei harii iha Manatuto,” Prezidente EDTL,E.P, Paulo da Silva, hateten iha Palásiu Governu hafoin relata servisu ba Primeiru Ministru, Taur Matan Ruak, segunda ne’e.
Nia dehan, ho lansamentu konkursu públiku ne’ebé EDTL,E.P ohin lansa ne’e, espera iha tempu besik setór privadu sira hatama sira-nia proposta no halo avaliasaun, nomos bele iha kompañia manán na’in.
“Tuir ita-nia espetativa ne’e, iha fulan agostu nia rohan hanesan ne’e ita bele hetan ona kompañia manán na’in atu bele asina kontratu hodi halo investimentu ba planta enerjia solar ne’e,” Paulo da Silva hateten.
Nia dehan, orsamentu ne’ebé EDTL,E.P halo ba iha investimentu planta enerjia solar 72MW to’o 85MW ne’e prevee kustu investimentu kapitál estimativu ne’e hamutuk besik milliauun $120.
“Hosi orsamentu milliaun $120 inklui ona planta enerjia solar ne’e, nomós ninia battery energy strorage system,” nia dehan.
Jornalista : Arminda Fonseca
Editora : Armandina Moniz
