DILI, 27 Abríl 2026 (TATOLI)–Ministériu Asuntu Kombatente Libertasaun Nasionál (MAKLN) liuhusi Tékniku Baze dadus iha Diresaun Nasionál ba Pensaun no Subvensaun (DNPS), Segunda ne’e, halo pagamentu ba pensaun veteranu daze daruak ba benefisiáriu hamutuk 3.391, iha Komoro.
Benefisiáriu hirak ne’e mai husi kombatente sira ne’ebé rejistadu iha rejistu daruak tinan tinan 2009.
Husi totál 3.391 ne’e, Munisípiu Aileu hamutuk ema na’in-210, Munisípiu Ainaru na’in-229, Munisipiu Baukau na’in-321, Munisípiu Bobonaru na’in-242, Munisípiu Kovalima na’in-238, Munisípiu Dili na’in-764, Munisípiu Ermera na’in-283, Munisípiu Lautein na’in-193, Munisípiu Likisá na’in-212, Munisípiu Manatuto na’in-127, Munisípiu Manufahi na’in-176, Munisípiu Oekusi na’in-sia, Munisipiu Vikeke na’in-152, no fora husi Timor-Leste hamutuk na’in-19.
Benefisiáriu hamutuk 1.274 sei simu kada fulan ba pensaun sobrevivénsia, pensaun subsisténsia no pensaun espesiál reforma, benefisiáriu 870 sei simu dala-da de’it prestasaun pekuniária únika – 3 á 7, no benefisiáriu 1.247 atu simu apoiu finanseiru úniku $10.000 (simu dala-ida de’it).
“Mekanizmu atendimentu hodi atribui fixa pagamentu ne’e tenke liuhusi dalan-ida de’it. Katak, benefisiáriu hotu-hotu ne’ebé atu foti sira-nia osan, ka sira-ninia inan ka aman ninia pensaun, tenke mai hotu iha DNPS hodi atualiza dadus iha Sistema. Mekanizmu ida-ne’e halo hodi evita falsifikasaun no asegura katak, osan ne’ebé Estadu no Governu atu atribui, tenke bá duni ema ne’ebé Loos,” referidu nota husi MAKLN.
Notísia relevante : Pagamentu faze daruak ba kombatente nasionál realiza iha 27 Abríl
Tuir oráriu, atribuisaun fixa pagamentu ne’e hahú uluk husi Aileu 27 Abríl 2026, tuir fali Ainaru 28 Abríl 2026, Baukau 28 to’o 30 Abríl 2026, Bobonaru 01 Maiu 2026, Kovalima 04 Maiu 2026, Dili 05 to’o 07 Maiu 2026, Ermera 08 Maiu 2026, Lautein 11 Maiu 2026, Likisá 12 Maiu 2026, Manatutu 13 Maiu 2026, Manufahi 14 Maiu 2026, Oekusi 15 Maiu 2026, Vikeke 18 Maiu 2026, no ikus liu mak sira ne’ebé fora husi Timor-Leste hahú iha loron 19 Maiu 2026.
Ho nune’e, MAKLN kontinua fó hanoin ba benefisiáriu 3.391 ne’ebé atu foti fixa pagamentu iha 27 Abríl ne’e tenke la’o tuir oráriu ne’ebé mak estabelese ona tuir kada munisípiu hodi nune’e bele evita ema sen malu.
Tuir dadus, pagamentu pensaun ba veteranus husi tinan 2008 to’o 2026, Governu realiza pagamentu ona ba ema hamutuk 44.671, ho kategoria pensaun sobrevivénsia, pensaun subsisténsia ho pensaun espesiál reforma.
Enkuantu, sira ne’ebé simu pensaun ho kategoria prestasaun pekuniária únika – 3 á 7 hamutuk 25.504 no benefisiáriu hamutuk 798 simu pensaun ho kategoria apoiu finanseiru úniku $10.000 – simu dala-ida de’it.
Antes ne’e, ekipa halo ona abertura pagamentu ba pensaun veteranu faze dahuluk ba benefisiáriu sira hamutuk 15.697 iha loron 15 Dezembru 2025 no finaliza ona 100% iha Fulan-Marsu.
TATOLI
