DILI, 09 Abríl 2026 (TATOLI)—Tékniku sira husi Ministériu Asuntu Kombatente Libertasaun Nasionál (MAKLN) halo ona preparasaun ba pagamentu veteranu faze daruak nian, ne’ebé sei realiza iha fulan ida-ne’e nia laran.
“Agora ami halo ona preparasaun ba pagamentu faze daruak nian, ne’ebé sei hala’o iha loron 27 Abríl tinan-ne’e. Faze daruak ne’e benefisiáriu 3.391. Husi númeru 3.391 ne’e sei halo pagamentu fulan-fulan ba benefisiáriu 1.274. Ida-ne’e ba pagamentu sobrevivénsia, pensaun substénsia, pensaun espesiál reforma nian,” Ministru Asuntu Kombatente Libertasaun Nasionál, Gil da Costa Monteiro ‘Oan-Soru’ hato’o ba Ajénsia TATOLI iha programa Entrevista Eskluziva, semana ne’e.
Notísia relevante : BNCTL halo pagamentu direta ba idozu sira ne’ebé ho kondisaun moras iha uma
Ministru apela ba públiku, liuliu ba benefisiáriu hamutuk 3.391, katak kalendáriu taka hotu ona iha munisípiu sira hotu. Nune’e, husu ba benefisiáriu atu marka prezensa tuir kalendáriu ne’ebé fó sai.
“Ezemplu Munisípiu Aileu no Ainaru sei mai iha 27 Abríl. Favor ida iha loron 27 ita-boot sira mai tenda, ami sei tau fatin iha baze dadus nian, hotu-hotu mai la’o tuir formatura ne’ebé iha. Mai lalika hadau malu tuir ho vontade para bele kontribui ba prosesu atu labele akontese buat ruma ne’ebé ita la espera, liuliu ba veteranu sira. Veteranu sira tenke hatudu nafatin disiplina ba jerasaun foun sira, disiplina ne’e importante tebes hodi garante estabilidade ba ema hotu, ba públiku no ba nasaun nia di’ak,” Oan-Soru, katak.
Antes ne’e, MAKLN halo pagamentu ba faze dahuluk ba benefisiáriu hamutuk 15.000-resin, iha loron 15 Dezembru 2025.
Jornalista : Osória Marques
Editora : Julia Chatarina
