Komunidade iha Maucatar seidauk simu Cesta Bázika
COVALIMA, 27 febreiru 2023 (TATOLI)–Reprezentante postu administrativu Maucatar, xefe suku Belekasak, Leonito Gusmão, hateten maske komunidade iha postu administrativu sira seluk simu-ona Cesta Bázika maibé komunidade iha Maucatar seidauk simu Cesta Bázika.
Notísia Relevante: Autoridade seidauk simu orientasaun hosi SECoop distribui cesta bázika iha Covalima
“Ha’u reprezenta autoridade postu Administrativu Maucatar, ita ko’alia kona-ba distribuisaun Cesta Bázika durante ne’e iha fallansu tanba ho razaun maske ami halo ona konkordánsia ho kompaña distribuidór Cesta Bázika iha dezembru tinan 2022 ne’ebé asina, husu xefe na’in-haat maibé to’o ohin loron seidauk halo distribuisaun Cesta Bázika ba komunidade iha Maucatar,” Xefe suku Belekasak, Leonito Gusmão, hateten ba Agência Tatoli, iha resintu AMC, segunda ne’e.
Xefi na’in-haat (4) halo ona konkordánsia no asina ona termu distribuisaun ho kompañia Urema Unipesoál, Lda, maibé to’o ohin loron kompañia refere seidauk halo distribuisaun Cesta Bázika ba komunidade, no halo komunidade kontinua hein to’o ohin loron.
Bazea ba xefe suku halo koordenasaun ho kompaña timoroan nian ne’e liuhusi telfónika, maibé kompaña hatán problema la’ós iha parte kompañia nian tanba kompañi prontu ona atu halo distribuisaun Cesta Bázika ba komunidade, maibé Sekretáriu Estadu Kooperativa (SECoop, sigla portugés) mak hatán atu hadi’a
“ Ita halo ona koordenasaun ho kompañia hodi husu liuhosi telfónika, husu razaun seidauk halo distribuisaun Cesta Bázika maibé kompaña hatán problema la’ós husi kompañia maibé Sekretáriu Estadu Kooperativa mak mak hateten dehan hein lai mak distribui,” nia dehan.
Antes ne’e, iha fulan dezembru tinan 2022, kompañia asina ona akordu atu halo distribuisaun Cesta Bázika ba komunidade iha fulan-janeiru, maibé agora fulan-fevreiru mós atu ramata ona, maibé to’o ohin-loron seidauk halo distribuisaun.
Benefisiáriu iha postu administrativu Maucatar, munisípiu Covalima hosi suku haat (4) hanesan iha suku Matai, Ogues, Belekasak no Hopilat ho nia populasaun hamutuk 13,429 ho uma-kain hamutuk 3.189.
Jornalista : Celestina Teles
Editór : Cancio Ximenes
