DILI, 27 fevereiru 2023 (TATOLI) – Ministériu Asuntu Parlamentár no Komunikasaun Sosiál (MAPKOMS) sei instala torre tolu no uma-rua ba torre ho kustu millaun $1-resin.
Instalasaun torre iha munisípiu Lautém iha área Naunil, Ainaro iha Fleixa no Bobonaro iha Tapotas ho objetivu atu dijitaliza Rádiu Televizaun Timor-Leste, Empreza Públika (RTTL, EP).
Ekipamentu sira ba instalasaun disponibiliza hodi Governu Xina tanba tuir akordu ne’ebé iha, Timor-Leste prepara de’it mak torre.
Ministru Asuntu Parlamentár no Komunikasaun Sosiál, Francisco Jerónimo, hatete MAPKOMS estabelese tiha ona kontratu ho empreza indonézia Global Citra Tama no konkursu públiku bá projetu harii torre tolu ne’e halo husi Komisaun Nasionál Aprovizionamentu (CNA, sigla portugés).
“MAPKOMS simu de’it nia rezultadu hodi ikus mai asina kontratu serbisu ho empreza vensedór Global Citra Tama”, governante afirma hafoin relata progresu serbisu ba Xefe ezekutivu, iha Palásiu Governu.
Iha ámbitu reuniaun ho Xefe Ezekutivu, ministru Francisco Jerónimo, konvida mós Primeiru-Ministru atu halo lansamentu ba instalasaun torre iha Lautém, iha 23 marsu.
“Atu inisia projetu ne’e presiza halo mobilizasaun ba materiál iha fatin harii torre tolu iha Lautém, Ainaro no Bobonaro”, katak.
Harii torre tolu iha munisípiu refere atu dijitaliza RTTL tuir programa Governu nian hodi muda husi análogu ba dijitál. “Dijitalizasaun ba RTTL uza multimédia terrestre no lauza satélite. Ne’e maka ita halo no hahú daudaun ho torre tolu ne’e”, governante ne’e esplika.
Governu foin harii torre ida iha postu administrativu Bazartete, munisípiu Liquiçá no tuir planu sei instala tan torre 11 hodi kompleta ba 12.
Notísia relevante: Governu sei instala Torre iha munisípiu tolu
Jornalista: Antónia Gusmão
Editora: Maria Auxiliadora
