DILI, 27 fevereiru 2023 (TATOLI) – Ministru Finansa (MF), Rui Gomes, hatete kada sidadaun tantu konsumidór komu importadór iha obrigasaun atu selu impostu ba Estadu.
“Ita hotu hatene katak kualker sidadaun tenke submete ba lei. Pagamentu impostu ne’e obrigasaun kada sidadaun, hosi konsumidór to’o investidór, tenke selu”, Rui Gomes reiteira hafoin relata progresu serbisu ba Primeiru-Ministru, Taur Matan Ruak, iha Palásiu Governu.
Relasiona ho impostu ne’ebé Governu introduz no iha empreza importadora balun ne’ebé hakarak atu reesporta nia kontentór maka Ezekutivu fó alternativu ba sira [importadór] katak selu impostu ho forma fazeada ka reesporta.
“Karik lakohi halo buat rua ne’e hotu sei entrega mai Ezekutivu no saida mak sei halo maka avansa ba distruisaun. Ha’u rona katak kontentór sira tama mai ne’e barak liu maka lori susu-been ida ne’ebé kahur barak liu ho masin-midar ho bee, ida ne’e mak ita-nia problema”, dehan.
Governu hakarak prevene moras hanesan diabetes, kolestról maka aplika impostu ba bebida asukarada sira. Tanba bazeia ba estudu lubuk ida ne’ebé halo kona-ba konsumu masin-midar ho bebida asukarada sira ne’e ninia impaktu boot tebes ba ema-nia saúde.
“Ida ne’e aban-bainrua sei sai kustu ne’ebé todan ba Estadu tanba ne’e maka hakarak prevene no muda ema nia komportamentu para labele konsumu buat sira ne’ebé estraga saúde”, nia afirma.
Antes ne’e, Alfándega simu pedidu husi empreza importadora sira atu repatria kontentór ho bebida asukarada iha Portu Tíbar no iha Postu Integradu Batugadé.
Empreza sira ne’ebé hatama pedidu hodi halo reesportasaun ba kontentrór iha janeiru hosi Fronteira Batugadé mak Lucky Strike Unip. Lda, Suhuruma Developer Unip. Lda no Timor Food Unip. Lda. Sasán ne’ebé empreza sira hakarak reesporta mak bebida asukarada sira.
Notísia relevante: Alfándega aprova pedidu hosi empreza importadora ba reesportasaun kontentór iha Tibar no Batugadé
Jornalista : Antónia Gusmão
Editora: Maria Auxiliadora
