DILI, 27 fevereiru 2023 (TATOLI) – Ministru Finansa (MF), Rui Augusto Gomes, relata progresu serbisu ba Primeiru-Ministru (PM), Taur Matan Ruak, liuliu kona-ba saláriu ba funsionáriu kazuál no asesór sira ne’ebé tama tarde.
“Informa ba Primeiru-Ministru sobre saláriu ne’ebé atraza tanba falla uitoan hosi liña ministeriál balun ne’ebé asina kontratu tarde. Nune’e maka iha fulan-janeiru lakonsege halo no fevereiru mak foin tama tanba iha retroativu janeiru no fevereiru nian”, Rui Gomes hateten hafoin hasoru malu ho Xefe Ezekutivu, iha Palásiu Governu.
Razaun seluk halo saláriu atraza tanba fund source ka fonte orsamentu muda sistema hosi Consolidated Fund of East Timor (CFET) ba kada konta ministériu sira ne’ebé agora desentraliza iha pagamentu tezouru.
“Tanba ne’e maka lori atrazu uitoan, espera katak iha fulan-marsu bá oin laiha ona problema”, nia konklui.
Relasiona ho ezekusaun Orsamentu Jerál Estadu (OJE) 2023, esklui kompromisu no obrigasaun sira, dadus husi Ministériu Finansa hatudu to’o 24 fevereiru atinji ona millaun $87,6 husi totál orsamentu aprovadu biliaun $2,16.
Notísia relevante : https://tatoli.tl/2023/02/26/atualiza-ezekusaun-real-oje-2023-atinji-millaun-876/
Jornalista: Antónia Gusmão
Editora: Maria Auxiliadora
