DILI, 01 marsu 2023 (TATOLI) – Vise-Ministru Negósiu Estranjeiru no Kooperasaun (MNEK), Julião da Silva, aprezenta opsaun sira polítika-lejizlativa, iha ámbitu reuniaun Konsellu Ministru ne’ebé sai hanesan baze ba inisiativa hodi kria rejime kontratasaun pesoál ida ba apoiu atividade sira adezaun Timor-Leste nian ba Asosiasaun Nasaun sira iha Sudeste Áziatika (ASEAN, sigla ingles).
“Vise Ministru halo aprezentasaun preliminár ida kona-ba kritériu sira ba kontratasaun no responsabilidade sira husi entidade ne’ebé atu kria ba efeitu ida-ne’e, nune’e mós informasaun sira kona-ba prosedimentu sira kontratasaun no kona-ba prosesu selesaun nian”, Ministru Prezidénsia Konsellu Ministru, Fidélis Magalhães, dehan iha Palásiu Governu, kuarta ne’e.
Nia subliña, objetivu ba rejime kontratasaun pesoál ne’ebé dezenvolve hela mak atu garante kontratasaun husi profisionál sira ho kualifikasaun ne’ebé aas tebetebes, atu nune’e Timor-Leste bele prepara-aan didi’ak hodi kumpre rekizitu no obrigasaun nesesáriu sira ba adezaun ba ASEAN.
“Forsa traballu daudaun ne’ebé ita iha seidauk to’o tanba adezaun ba ASEAN presiza atu iha espesialista sira hosi setór oioin, tanba ne’e maka ita presiza atu halo rekrutamentu foun”, nia salienta.
Nune’e, Konsellu Ministru halo ona apresiasaun no rona aprezentasaun no Xefe Governu fó ona orientasaun ba iha iha MNEK, nomós ministériu sira seluk hodi kontribui ba realiza lalais prosesu rekrutamentu hamutuk ho Komisaun Funsaun Públika (KFP).
Lembra katak líder ASEAN sira to’o ona akordu prinsípiu ida ne’ebé sei permiti entrada Timor-Leste hanesan membru organizasaun da-11.
Mehi Timor-Leste atu sai membru ASEAN persiste dezde 1975, altura iha ne’ebé país proklama nia independénsia.
Notísia relevante: Sekretariadu ASEAN kapasita ofisiál liña ministeriál sira iha pilár ekonómiku
Jornalista: Antónia Gusmão
Editora: Maria Auxiliadora
