NASIONÁL, EKONOMIA, HEADLINE, POLÍTIKA

Komisaun Nasionál Aprovizionamentu transforma ona ba institutu públiku

Komisaun Nasionál Aprovizionamentu transforma ona ba institutu públiku

Edifisiu Ministeriu Finansa.Imajen/TATOLI

DILI, 01 marsu 2023 (TATOLI) – Prezidente Repúblika, José Ramos Horta, promulga ona Dekretu-Lei n.u 3/2023, 15 fevereiru hodi transforma Komisaun Nasionál Aprovizionamentu (CNA, sigla portugés) ba institutu públiku foun.

“Dekretu-Lei ne’e públika ona iha Jornal da República iha loron 15 fulan-fevereiru liuba”, refere nota husi Ministériu Finansa ne’ebé Agência Tatoli asesu.

Diploma foun ne’e ho objetivu prinsipál atu hasa’e kapasidade jestaun, resposta no autonomia instituisaun CNA hodi mellora liután efisiensia no efikasia aprovizionamentu iha setór públiku administrativu.

Eis-Prezidente Repúblika, Francisco Guterres ‘Lú-Olo’, promulga, iha tinan kotuk, Dekretu-Lei n.u 22/2022, 11 maiu kona-ba Rejime Jurídiku Aprovizionamentu, Kontratu Públiku ho nia Infrasaun sira ne’ebé alarga ona atribuisaun ba CNA. Nuune’e importante tebes atu adapta institutu públiku foun ne’e nia natureza serbisu no rekursu sira ho tarrefa servisu foun ne’ebé CNA sei hala’o.

“Ho diploma foun ne’e CNA hetan atribuisaun hodi halo prosedimentu aprovizionamentu ho valór hanesan ka liu millaun $1 ba servisu no entidade setór públiku administrativu. Bainhira hetan solisitasaun husi Prezidénsia Repúblika, Parlamentu Nasionál, Rejiaun Administrativa Espesiál Oé-Cusse Ambeno (RAEOA) no munisípiu sira, CNA mós bele halo prosedimentu aprovizionamentu ba entidade Estadu hirak ne’e”, haktuir.

Diploma foun ne’e permite CNA atu organiza nia estrutura servisu ne’ebé inklui diresaun sira hanesan Apoiu Jurídiku; Aprovizionamentu Bens no Servis; Aprovizionamentu Obra; Kontrolu Kualidade no Servisu Korporativu.

Durante mandatu Governu Daualuk, dezde 2018, CNA realiza ona konkursu aprovizionamentu ba projetu hamutuk 352 ho totál kustu estimativa biliaun $1,3.

Durante tinan lima ikus ne’e, CNA realiza ona konkursu aprovizionamentu ba kontratu ne’ebé mak ezekuta ona hamutuk projetu 257 no valór kontratu kuaze millaun $621,1. Totál númeru pakote ne’ebé mak iha hela progresu nia laran hamutuk projetu 95 ho kustu estimativa millaun $682,7.

Fonte finansiamentu orsamentu ba projetu 352 ne’e mai husi fonte prinsipál tolu, hanesan Fundu Infraestrutura, Fundu La’ós-Infraestrutura no empréstimu husi Banku Aziátiku ba Dezenvolvimentu no Banku Mundiál.

Rekorde katak, iha 2011, CNA kria liuhusi Dekretu-Lei n.u 14/2011, 30 marsu ho objetivu atu presta servisu aprovizionamentu ida ne’ebé di’ak ba liña ministeriál no entidade públika sira seluk, liuliu ba projetu infraestrutura boot estratéjiku sira nomós atu alkansa tranparénsia ba prosesu aprovizionamentu Estadu nian.

Jornalista: Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!