NASIONÁL, EDUKASAUN, DILI, HEADLINE

Pagamentu bolsa méritu ba estudante 13.517 sei realiza marsu nia klaran

Pagamentu bolsa méritu ba estudante 13.517 sei realiza marsu nia klaran

Ministru Eduksaun, Juventude no Desportu, Armindo Maia.Imajen/TATOLI

DILI, 01 marsu 2023 (TATOLI)–Ministru Edukasaun Juventude no Desportu (MEJD), Armindo Maia, garante katak pagamentu bolsa méritu ba estudante hamutuk 13.517 iha territóriu nasionál sei realiza iha fulan-marsu nia klaran.

“Ha’u hanoin marsu nia klaran, ita bele realiza ona pagamentu ba ita-nia estudante sira-ne’ebé hetan bolsa méritu iha tinan ida-ne’e,” Armindo Maia hateten ba jornalista sira hafoin ramata enkontru konsellu ministru iha Palásiu Governu, kuarta ne’e.

Agora daudaun MEJD loke hela prosesu simu reklamasaun hosi Munisípiu sira kona-ba preokupasaun valór sira-ne’ebé hamosu hela dezentendimentu ba malu, maibé bainhira termina ona prosesu ba pagamentu liuhosi Banku Nasional Komérsiu Timor-Leste (BNCTL) laiha tan ona problema.

“Ita loke prosesu ne’e atu fasilita dirasaun servisu sira iha Munisípiu atu hato’o reklamasaun estudante sira-nian kona ba valór sira-ne’ebé mak hamosu hela dezentendimentu ba malu, maibé bainhira tempu termina ona laiha tan simu reklamasaun atu nune’e bele fó tempu ba ita-nia ekipa sira hodi halo verifikasaun,” nia hateten.

Diretór Jerál Edukasaun Ensinu, Luis Manuel da Costa Fernandes, informa to’o agora osan sira ne’ebé iha BNCTL kona-ba atu apoiu bolsa méritu ba estudante hamutuk 13.517 seidauk transfere ba estudante sira-nia konta bankária, tanba sei hein hela prosesu reklamasaun kuandu hetan hotu ona verifikasaun mak foin transfere dala ida.

Tanba hosi prosesu verifikasaun ne’e mak sei identifika ho loloos estudante na’in hira mak merese atu tama tan no na’in hira mak la merese atu hetan.

Ne’ebé, iha prosesu ne’e kuandu identifika laiha ona problema bele avansa ona ho prosesu pagamentu, maibé molok atu halo transferénsia osan ba konta bankária estudante sira-nian mós lista estudante sira-nian tenke públika uluk iha jornál da Repúblika.

“To’o agora ha’u konfirma lista estudante bolsa méritu 13.517 ne’e seidauk públika iha jornál da Repúblika,” nia dehan.

Notísia Relevante: MEJD mantein transfere osan bolsa méritu liuhosi BNCTL

Jornalista : Tomé Amado

Editór       : Cancio Ximenes

iklan
iklan

Leave a Reply

iklan
error: Content is protected !!