MEJD mantein transfere osan bolsa méritu liuhosi BNCTL
DILI, 27 fevereiru 2023 (TATOLI)–Ministériu Edukasaun Juventude no Desportu (MEJD) mantein sistema transferénsia osan bolsa méritu liuhosi Banku Nasionál Komérsiu Timor-Leste (BNCTL) ba benefisiáriu 13.517 nia konta bankária ne’e rigorozu ona.
Notísia Relevante: Prosesu bolsa méritu tarde, millaun $7,2 sei hatama ba kofre Estadu
Diretór Jerál Edukasaun Ensinu, Luis Manuel da Costa Fernandes, hateten MEJD konsidera sistema ne’ebé maka BNCTL sei uza hodi halo transferénsia osan ba benefisiáriu bolsa méritu 13.517 ne’e di’ak no rigorozu liu ona, tanba laiha tan dalan seluk atu muda sistema pagamentu bolsa méritu ba benefisiáriu sira-ne’e.
“Buat ida osan ne’e iha ninia kritériu satan osan ne’e sei transfere liu hosi banku ida-ne’e rigorozu liután. Tanba ne’e tenke iha duni medida ida hanesan ne’e atu ema bele simu duni osan ne’e ho loloos. Se ema hotu nia hanoin katak nusa osan ne’e la fó direta de’it ba benefisiáriu sira, ha’u hanoin bele mosu manipulasaun ruma,” Luis Manuel da Costa Fernandes, hateten ba Agência Tatoli iha nia kna’ar fatin, Vila Verde, segunda ne’e.
Nia dehan, planu MEJD nian atu apoiu prémiu bolsa méritu ba estudante mellór klasifikadu sira iha territóriu nasionál ne’e fó sai kuaze fulan neen antes ona, hodi husu ba estudante sira hamutuk ho inan-aman sira atu hahú trata ona dokumentu sira hodi fasilita oan sira-ne’ebé idade seidauk to’o atu bele hetan sira-nia konta bankária.
Maibé, tuir nia, informasaun sira-ne’ebé mak parte MEJD fó sai ba eskola sira iha territóriu nasionál ne’e barak mak la halo esforsu hodi ba trata sira-nia dokumentu, agora tempu limitadu ona mak mosu razaun oioin hodi husu atu muda sistema pagamentu ne’e parese defisil liután.
“Ha’u hakarak dehan ita hela iha Timor nu’udar sidadaun ida maibé ita laiha sertidaun RDTL no laiha Billete Identidade ne’e defisil. Agora kuandu ita laiha dokumentu sira-ne’e, sé mak atu lori kulpa ida-ne’e,” nia hateten.
Ho nune’e, diretór ne’e husu nafatin ba benefisiáriu ida-ne’ebé mak seidauk iha konta bankária atu halo esforsu oinsá hodi ko’alia ho inan-aman sira bele trata lalais dokumentu sira-ne’ebé banku presiza atu nune’e bele hetan konta bankária hodi fasilita BNCTL bele halo transferénsia.
Diretór Servisu Edukasaun Munisípiu Aileu, Carlito Pereira, hateten iha estudante ida hosi nivél ensinu sekundáriu tékniku vokasionál ne’ebé tama iha mellór klasifikadu nivél munisipál to’o agora seidauk trata ninia konta bankária ho razaun ninia aman katuas ona, matan mós aat hotu ona la’o la di’ak, hela iha Turiskai, bainhira atu trata dokumentu tenke ba fali Same Vila.
“Ita-nia estudante ne’e dehan, se ida-ne’e mak Ministériu Edukasaun no Banku presiza tenke hatama konta bankária, nia deside ona entrega fali ba ema seluk ne’ebé presiza tanba defisil nia atu lori nia aman ho kondisaun hanesan ne’e ba-mai Same, hodi trata dokumentu sira-ne’e,” nia dehan.
Tanba ne’e hanesan responsavel edukasaun Munisipál husu nafatin ba Ministériu Edukasaun Nasionál atu buka netik dalan ruma hodi ajuda rezolve problema estudante ne’e nian, tanba nia mai hosi família ida-ne’ebé moris defisil.
Notísia Relevante: MEJD prepara ona millaun $7 ba estudante mellór klasifikadu
Jornalista : Tomé Amado
Editór : Cancio Ximenes
