PN husu Governu fó nafatin rekoñesimentu ba veteranu sira
DILI, 01 marsu 2023 (TATOLI)—Vise Prezidente Parlamentu Nasionál, Maria Angelina Sarmento, husu Governu atu kontinua fó rekoñesimentu kontinuidade ba veteranu sira atu moris ho dignu.
Notísia Relevante: Riak Leman husu timoroan tau importánsia ba loron nasionál veteranu
Nia hateten, loron 03 marsu Timor-Leste selebra loron nasionál veteranu nian ne’ebé loron ne’e importante tebes iha luta libertasaun no to’o ohin loron veteranu sira merese duni hetan moris ida dignu no hetan atendimentu públiku ne’ebé dignu hosi Estadu.
“Ha’u-nia mensajen atu Governu fó kontinuidade ba rekoiñesimentu veteranu sira liu-liu ita-nia konstituisaun rekoñese erói no mártir libertasaun atu sira hetan moris ida dignu,” Vise Prezidente Parlamentu Nasionál, Maria Angelina Sarmento, hateten relasiona ho komemorasaun loron nasionál veteranu 03 marsu, iha Parlamentu Nasionál, kuarta ne’e.
Timor-Leste iha ona polítika públika barak apoiu veteranu sira hodi hadi’a sira-nia moris liuhosi pensaun no subsídiu mensál ba sira, maibé iha veteranu barak mak to’o agora sira-nia dadus hetan validasaun ona maibé seidauk iha apoiu subsídiu ruma fó ba sira.
Tuir nia, haree ba iha Orsamentu Jerál Estadu (OJE) kada tinan aloka ba veteranu boot tebes, tanba ne’e mak VIII Governu Konstituisionál pretende atu aumenta osan liuhosi kria fundu veteranu nian ho montante billaun $1 maibé hetan veta hosi Prezidente Repúblika.
“Fundu ne’e la’ós atu gasta de’it fundu mina-rai maibé nia sai hanesan fundu atu jere reseita foun iha future, atu nune’e ita-nia osan mina-rai labele mohu ba beibeik, tanba ita sei selu subsídiu barak ne’ebé ita-nia polítika públika iha,” nia hateten.
Mezmu fundu ne’e la hetan promulgasaun, maibé nia fiar katak progresu sira ligadu ho rejistu no validasaun ba veteranu ne’ebé daudaun la’o hela, ema hotu sei hetan tratamentu hanesan liu-liu sira-ne’ebé ho grau 03 ka 4-8 ne’ebé barak seidauk hetan apoiu hosi Governu.
Jornalista : Nelson de Sousa
Editór : Cancio Ximenes
