DILI, 01 marsu 2023 (TATOLI) – Prezidente Repúblika (PR), José Ramos Horta, promulga ona Dekretu-Lei n.u 4/2023, 15 fevereiru hodi transforma Diresaun-Jerál Estatístika (DJE) sai nu’udar Institutu Nasionál Estatístika Timor-Leste (INETL, I.P).
“Dekretu-lei ne’e hetan ona promulgasaun husi Prezidente Repúblika no públika ona iha Jornal RepúbliKa iha loron 15 fulan-fevereiru liubá”, haktuir nota husi Ministériu Finansa ne’ebé Agência Tatoli, ohin.
Diploma foun ne’e aprezenta husi Ministru Finansa, Rui Gomes hodi transforma DJE ba INETL, I.P. ho objetivu prinsipál atu hasa’e kapasidade jestaun no autonomia instituisaun foun ne’e hodi mellora liután kualidade, imparsialidade no konfiansa ba iha estatístika ofisiál Estadu nian.
Diploma ne’e aliña ho Polítika Reforma Jestaun Finansa Públika ne’ebé mak inísia ona desde 2015 husi Governu Dalimak no Programa Governu Daualuk ne’ebé prevee fortalesimentu instituisaun Estadu ne’ebé mak responsável ba produsaun estatístika nasionál.
“Ho promulgasaun ne’e, DJE transforma ona ba INETL, no sai nu’udar institutu públiku foun ida ne’ebé integra iha administrasaun indireta Estadu iha mahon Ministériu Finansa ne’ebé iha autonomia téknika, administrativa, finanseira no patrimóniu própriu”, nota ne’e refere.
Ho Diploma foun ne’e, INETL, I.P. hetan atribuisaun lubuk ida inklui rekolla, análiza no halo produsaun estatístika ofisiál nasionál inklui Sensu no Konta Nasionál. Aleinde ne’e, institutu foun ne’e mós sei relata informasaun, relatóriu inklui klarifikasaun ruma kona-ba estatístika ofisiál ba públiku.
Timor-Leste hahú implementa atividade estatístika dezde aprovasaun Dekretu-Lei n.u 17/2003, 01 outubru kona-ba Estatístika, dahuluk husi Diresaun Nasionál Estatístika no daudaun ne’e husi Diresaun-Jerál Estatístika, Ministériu Finansa.
Nune’e, diploma foun ne’e sei revoga Diploma Ministerial n.u 49/2021, 21 jullu kona-ba Estrutura orgániku-funsionál, Diresaun Jerál Estatístika no hahú vigora iha loron tuirmai hafoin publikasaun iha Jornal Repúblika.
INETL, I.P. sei lidera husi prezidente ida ne’ebé hetan nomeasaun husi membru Governu responsável iha área Finansa ba mandatu tinan haat ho nia unidade orgánika inklui, Diresaun Apoiu Jurídiku, Diresaun Estatístika Ekonómika, Diresaun Estatístika Sosiál no Demográfika, Diresaun Estatístika Rejionál no Munisipál, Diresaun Metodolojia, Diresaun Sistema no Reporte no Diresaun Servisu Korporativu.
Jornalista: Antónia Gusmão
Editora: Maria Auxiliadora
