DILI, 02 marsu 2023 (TATOLI)—Prezidente Parlamentu Nasionál (PPN), Aniceto Longuinhos Guterres Lopes, kinta ne’e, hala’o audiénsia ho Assosiasaun Manorin Na’in Timor-Leste (AMN-TL) hodi rona preokupasaun kona-ba profesór voluntáriu nia problema.
Notísia Relevante: Profesór voluntáriu hato’o lamentasaun ba komisaun G iha PN
“Ami Asosiasaun Manorian Na’in Timor-Leste agradese Parlamentu Nasionál, ohin simu ami mai iha ne’e hato’o prokupasaun bo tenke rezolve ami-nia problema hosi professór voluntáriu ne’ebé agora daudaun hasoru problema hatama ona karta reklamante tenke valoriza sira,” Prezidente Instaladór AMN-TL, Marcelino da Costa Belo, hateten ba jornalista sira hafoin ramata enkontru iha Parlamento Nasionál.
Ho preokupasaun ne’e, AMN-TL husu ba segundu órgaun soberania atu bele hato’o ba Governu liu-liu Ministériu Edukasaun Juventude no Desportu (MEJD) hodi bele fó solusaun profesór voluntariu iha territóriu Nasionál nia problema.
Nia dehan, durante sorumutu hetan resposta di’ak hosi Prezidente Parlamentu Nasionál katak presiza duni tau atensaun ba problema profesór voluntáriu, inklui presiza altera ona rezime tranzitória espesiál ne’ebé daudaun ne’e Ministériu Edukasaun Juventude no Desportu (MEJD) aplika tenke rejime espesiál permanente.
“Señor Prezidente Parlamentu hateten profesór sira-ne’e merese duni atu hetan rejime espesiál la’ós rejime tranzitória espesiál, maibé tenke rejime espesiál permanente. Iha artigu 11 Ministériu Edukasaun sita iha ne’eba katak profesór sira hetan rejime espesiál tranzitória nune’e tenke muda,” nia dehan.
Tanba, nia dehan, laiha profesór mak sei la prodús rekursu iha nasaun ne’e, tanba ne’e AMN-TL husu ba Governu liuhosi MEJD tenke rezolve problema hosi profesór voluntáriu ne’ebé agora daudaun hasoru problema ne’ebé submeter ona karta reklamasaun ba MEJD ne’e tenke valoriza sira.
Profesór kontratadu sira-ne’ebé hala’o nia kna’ar iha eskola kle’ur ona balun idade tinan 60 ona tenke foti ona ba profesór permanente, no mós profesór permanente ne’ebé daudaun iha ona karreira profesór tempu ona ministéiru foti ona sira ba profesór senior.
“Tanba durante ne’e, ami profesór permanente sira mate ho de’it saláriu $400, entaun ami Asosiasaun Manorin Na’in Timor-Leste mai ho tabela salárial ida-ne’ebé ami hato’o ona ba Governu hodi toma konsiderasaun, tanba profesór tenke moris dignu, kompara ho Ministériu Saúde hetan tiha ona rejime espesiál,” nia hateten.
Prezidente Komisaun G trata asuntu Edukasaun iha PN, António Verdiál, ne’ebé akompaña mós enkontru ne’e hateten ohin loron ksolok bele hasoru malu ho manorin na’in sira maibé kestaun ne’ebé foti Deputadu sira hosi Komisaun iha rezultadu fiskalizasaun identifika ona hodi bele husu Governu tau atensaun.
“Ha’u foti ezemplu, sira ohin foti profesór mate klamar iha realidade iha duni terrenu no agora daudaun ekipa hosi MEJD tun hela ba terrenu halo fiskalizasaun hodi halo reverifikasaun ba prosesu levantamentu dadus totál tomak,” nia dehan.
Nune’e, nia husu ba manorin na’in sira atu kalma kria situasaun ne’ebé di’ak hodi ba MEJD hala’o nia kna’ar tuir regra di’ak.
Kona-ba atu hasa’e saláriu profesór, Deputadu hosi bankada Governu ne’e hateten bainhira nia-parte asume Prezidente Komisaun G husu ona ba Governu atu hadi’a lei baze edukasaun nune’e bele hatán ba preokupasaun manorin na’in sira-nian.
Jornalista : Nelson de Sousa
Editór : Cancio Ximenes
